क्यानाडेली आन्द्रेस्कुयात यूएस ओपनया उपाधि
बियन्का आन्द्रेस्कु ग्राण्ड स्लाम टेनिसया उपाधि त्याकूम्ह न्हापांम्ह क्यानाडेली कासामि जूगु दु ।
 
थौं आइतवाः जूगु यूएस ओपनया फाइनल कासाय् आन्द्रेस्कुं २३गूगु ग्राण्डस्लाम च्याम्पियन अमेरिकी सेरेना विलियम्सयात ६–३ व ७–५या सेटं बुकूगु खः । थ्वया नापनापं झिंगुदँ दुम्ह आन्द्रेस्कु सन् २००६ थुखे यूएस ओपन त्याकूम्ह दकलय् म्हो उमेरया कासामि नं जूगु दु । उगु इलय् रुसया मारिया सारापोभां थुगु उपलब्धि हासिल याःगु खः । आन्द्रेस्कु यूएस ओपनय् डेब्यू यासें थःगु कासा जीवनया हे दकलय् न्हापांगु ग्राण्डस्लाम उपाधि त्याकूगु खः ।
 
कीर्तिमान २४गूगु ग्राण्डस्लाम उपाधि त्याकेगु नितिं न्ह्याः वनाच्वंम्ह सेरेना धाःसा लिपांगु प्यंगू ग्राण्डस्लामया फाइनलय् लगातार बूगु दु ।
 
यूएस ओपन विजेता आन्द्रेस्कुं धयादिल, ‘जिगु नितिं थ्व म्हगस पूवंगु थें जूगु दु । जिगु नितिं ला सेरेना थेंजाःम्ह महान कासामिलिसे म्हिते खंगु हे नं तःधंगु सम्मान खः ।’
 
आधुनिक टेनिस इतिहासय् आन्द्रेस्कुं दकलय् म्हो उमेरय् ग्राण्डस्लाम त्याकूगु कीर्तिमानया नितिं मोनिका सेलेसलिसे नं बराबरी याःगु दु ।
Categorized in कासा