ग्वसाःखलः क्यामरुनयात पेनाल्टी सुट आउटय् बुकाः इजिप्ट अफ्रिका कप अफ नेशन्स फुटबल च्याम्पियनसीपया फाइनलय् दुहाँवंगु दु ।

क्यामरुनया याउन्डेय् वंगु चान्हय् जूगु सेमिफाइनलया कासाय् इजिप्ट टाई ब्रेकरय् ३गू–१गू गोलं त्याःगु दु । क्वःछिनातःगु ई अले थप याःगु ईलय् न निगुलिं पुचलं गोल याये मफयेवं कासा टाई ब्रेकरय् वंगु दु ।

टाई ब्रेकरय् मोहोमद सालाहया ग्वहालिं इजिप्टं कासा त्याकुगु खः । इजिप्टं आः आइतवाः जुइगु फाइनलय् सेनेगलनाप धेंधेंबल्ला याइ ।

च्याम्पियनसीपया न्हापांगु सेमिफाइनल कासाय् बुर्किना फासोयात ३गू–१गू गोल अन्तरं बुकाः सेनेगल फाइनलय् थ्यंगु दु ।

फाइनल कासायात लिभरपुलया निम्ह स्टार कासामि सालाह व मानेदथुइया धेंधेंबल्लाया कथं विश्लेषण यानातःगु दु ।

इजिप्टं दकले उप्वः ७क्व तक अफ्रिका कप त्याकूगु दुसा सेनेगलं आःतक उपाधि त्याके मफुनि ।

Categorized in कासा