क्रिकेट कासामीपिन्त क्यान यात कारबाही
थिंला त्रयोदशी ११४२, पुष १ बिहीवाः
नेपाल क्रिकेट संघ (क्यानं) राष्ट्रिय क्रिकेट टिमया कप्तानपाखें ज्ञानेन्द्र मल्लयात बर्खास्त याःगु दु ।
क्यानया बुधबाः क्वचागु बोर्ड मुँज्यां मल्लयात कप्तानं चिइकेगु निर्णय याःगु खः । मुँज्यां राष्ट्रिय क्रिकेट टिमया कप्तानया भाला सन्दीप लामिछानेयात बिइगु निर्णय याःगु दु ।
क्यानं कप्तान मल्ल व उपकप्तानपाखें दीपेन्द्र सिंह ऐरीयात जिम्मेवारीपाखें चिइकेगु निर्णय याःगु खः । कासामिया केन्द्रिय सम्झौतायात कया कप्तान मल्ला लिसें छुं सिनियर कासामिं सार्वजनिक रुपय् कुँख्यंगु खः ।
कासामिया वर्गिकरण बैज्ञानिक व व्यवहारिक मजूगु धका मल्ल लिसें छुं सिनियर कासामिं कुँख्यंगु खः । उगु विषययात कया कासामिलिसे स्पष्टिकरण तकं न्यंगु खः ।
कासामिया स्पष्टिकरणं नुगः चिइमफूगु व कासामिं आचार संघीता पालना मयाःगु धका क्यानं कप्तान मल्ल लिसेंया कासामियात कारवाही याःगु खः ।
मुँज्यां कासामि आचार संघीता उल्लंघनय् मल्ल लिसें दीपेन्द्र सिंह ऐरी, सोमपाल कामी व कमल सिंह ऐरीयात सन् २०२२ या केन्द्रिय सम्झौतां सुरुया ६लाया नितिं दुमथ्याकेगु निर्णय याःगु दु ।
क्यानं राष्ट्रिय क्रिकेट टिमया प्रशिक्षण वइगु डिसेम्बर २१ निसें पोखराय् सञ्चालन यायेगु निर्णय याःगु दु ।
Categorized in कासा
