खोकना दमनविरुद्ध नेवाः न्ह्यलुवाःतय् विरोध
लहनान्युज | दिल्लागा द्धितीया ११४०,असार २३ मंगलवाः
ऐतिहासिक व सांस्कृतिक नेवाः बस्ती खोकनाया जनतायात थःगु बुँइ वा पी मब्युसे जूगु प्रहरी दमनयात कयाः नेवाः न्ह्यलुवाःतय्सं विरोध प्वंकूगु दु ।
नेसं ११४० तछलागा चतुर्दशी (असार २० गते) राज्यं पुलिस प्रशासन छ्यलाः खोकनाबासीतय्त थःगु हे बुँइ वा पीगुली अवरोध याःगु खः ।
प्रहरीया थुगु बर्बरता व दमनप्रति विरोध प्वंकुसें जनकवि दुर्गालाल श्रेष्ठ, नेवाः न्ह्यलुवाःपिं मल्ल के. सुन्दर, तीर्थराम डंगाल नेवाः पवित्र बज्राचार्य , उमेश श्रेष्ठ व सुजीव वज्राचार्यपिंसं थौं छगू वक्तव्य पिकाःगु दु ।
राज्यया थ्व दमन संविधानं जनतायात बियातःगु मौलिक हकया हनन जूगु धासें नेवाः न्ह्यलुवाःतय्सं थ्व घटनाया छानबिन यानाः राज्य प्रशासनयात गलतकथं छ्यःपिं दोषीतय्त कारबाहीया माग नं याःगु दु ।
प्रहरी दमन अन्तर्राष्ट्रिय कानुन व मान्यता अःखः जूगु नं न्ह्यथनातःगु दु । वक्तव्य धयातःगु दु, “आदिवासी, सामाजिक व सांस्कृतिक जीवन स्वानाच्वनीगु लागाय् राज्यं विकास निर्माणया ज्या न्ह्याकेबले प्रभावित जनताया समर्थन व इच्छा न्यनेमाःगु अन्तर्राष्ट्रिय मान्यता व कानुन दु । नेपालय् कानुन पालना याकेगु जिम्मा कयाच्वंगु राज्य व सरकार नं थ्व अन्तर्राष्ट्रिय मान्यता व कानुन अःखः वनेदइमखु ।”
थःगु भूमिइ फाष्ट ट्र्याक, स्मार्टसिटी आदि विकासया नामय् राज्ययात उपयोग याकेबीत खोकनावासीं अस्वीकार याःगु थ्व घटनां क्यंगु दु धासें सरकारं थ्व सम्बन्धय् आः खोकनाबासीनाप संवाद यायेमाःगु व विकासया योजना अनुमोदनया कुतःबाहेक विकल्प मदुगु खँ नं वक्तव्यय् न्ह्यथनातःगु दु ।
जनताया चाहना अःखःया विकास धइगु दलालतय् चाहनाया विकास जुइ धासें राज्य दलालया पक्षय् मखु जनताया पक्षय् वयेमाःगु माग नं वक्तव्यय् यानातःगु दु । जनताया पक्षय् मदुगु सरकार व राज्यप्रणाली विरुद्ध संघर्ष जुइ धासें सरकारयात जनताया अधिकारया पक्षय् सचेत जुइत नं वक्तव्यय् धयातःगु दु ।
