ख्वनामितयगु मागय् सांसद शाक्यया ऐक्यवद्धता
विकाश | दिल्लागा द्वितीया ११४० (२०७७ असार २३) मंगलबाः
बागमति प्रदेशया सांसद् राजेश शाक्यं ख्वनामितयसं थःगु बुँइ वा पी दयेमाःगु धयादीगु दु ।
लहनान्यूजलिसे खँ ल्हासें सांसद शाक्यं ख्वनामितयसं थःगु बुँइ वा पिनाः छुं नं गलत मयाःगु बिचाः तसें थःगु बुँइ वा प्यूपिं किसानतयत प्रहरीं याःगु दमन गलत जूगु धयादिल ।
कृषि प्रधान देशय् किसानयात वा पीत पनेगु ज्या यायेमज्यूगु खँय् शाक्यं बः बियादिल ।
राज्यं ख्वनाया खुदोलं फास्ट ट्र्याक दयेकेमाःगु खःसा जग्गा प्राप्ति ऐन कथं प्रक्रिया पूवंकाः जक न्ह्याःवनेमाःगु खँ शाक्यं तयादिल ।
‘जग्गा प्राप्ति ऐन कथं ख्वनाया बुँ थुवाःतयत पायछि कथं मुआब्जा बियाः उमित सन्तुष्ट यायेमाल अले जक अन सरकारया अधिकार जुइ’ शाक्यं धयादिल । ‘जग्गा प्राप्ति हे मयाःसे उकथं बुँज्या याकेमबीगु पायछि मजू ।’
ख्वनामितयगु मागय् थःगु नं ऐक्यवद्धता दुगु शाक्यं धयादिल ।
येँ–निजगढ स्वाइगु द्रुतमार्गया जिरो प्वाइन्ट ख्वनाया खुदोल क्षेत्रय् क्वःछिनातःगु दु । तर कौडीया भावय् मुआब्जा बियाः जग्गा कायेत स्वःगु धासें ख्वनामितयसं उकियात स्वीकार यानाच्वंगु मदु । उगु क्षेत्रय् लाःगु बुँइ किसानतयसं प्यदँ न्ह्यःनिसें वा पीमखंनि ।
उकिया नापं डिपिआर तकं मदयेक ज्या न्ह्याकेत्यंगु व आःया योजना कथं लँ दयेकूसा ख्वनाया ऐतिहासिक, साँस्कृतिक सम्पदा तकं लाःगु धासें ख्वनामिलिसें सम्पदाप्रेमीपिन्सं नं निरन्तर विरोधया ज्याझ्वः यानावयाच्वंगु दु ।
व हे झ्वलय् वंगु असार १५ गते ख्वनामिपिन्सं खुदोलय् थःगु बुँइ वा प्यूगु खःसा प्रहरीं दमन यानाः वा पीगु ज्याय् पंगः थंगु खः ।
प्रहरीया पंगः दथुइ बछि जक बुँइ वा पी सिधःगु धासें २० गते हाकनं ल्यं दनिगु बुँइ वा प्यूगु खः । उबले नं प्रहरीं लाठी चार्ज यायेगुया नापं दर्जन मल्याक्क अश्रुग्याँस नं कयेकूगु खः ।
लिपा राष्ट्रिय मानवअधिकार आयोगया प्रतिनिधि तुलसी थापाया उपस्थितीइ प्रहरी व स्थानीय किसानया वार्ता यायेधुंकाः वा पीगुलिइ पंगः मथनेगु सहमति जूगु खः ।
