गल्ती याःपिं त्रिविवि कर्मचारीयात कडा कारबाही : प्रम ओली
लहनान्यूज | ने.सं. ११३९ दिल्लाथ्व अष्टमि/नवमि (९ जुलाइ, २०१९), बुधवाः
प्रधानमन्त्री केपी शर्मा ओलीं गल्ती याःपिं त्रिभुवन विश्वविद्यालयया कर्मचारीयात कडा कारबाही यायेगु ख्याच्वः बियादीगु दु ।
त्रिभुवन विश्वविद्यालयया कूलपतितकं जुयादीम्ह प्रधानमन्त्री ओलीं विश्वविद्यालय थेंजाःगु पवित्र थासय् बेथिति दुतहःपिं नापं अनियमितता याइपिं सुं नं कर्मचारीयात कडा कारवाही जुइगु धयादिल ।
त्रिभुवन विश्वविद्यालयया ६०क्वःगु स्थापना दिवसया झ्वलय् थौं बुधवाः येँय् ग्वसाः ग्वःगु प्राज्ञसभाय् न्ववानादिसें ओलीं विश्वविद्यालयस गल्ती याइपिं कर्मचारीपिन्त सरकारं दण्ड व बांलाःगु ज्या याइपिं कर्मचारीपिन्त सिरपाः बीगु नं स्पष्ट यानादिल ।
प्रधानमन्त्री ओलीं देशया शिक्षा क्षेत्रयात हलिमय् हे प्रतिस्पर्धा यायेबहः जुइकथं दयेकेत सरकार प्रतिबद्ध जूगु नं धयादिल । वय्कलं आवश्यकताकथं दक्ष जनशक्ति दयेकेगु ज्याय् न्ह्यज्यायेत नं फुक्क विश्वविद्यालययात इनाप यानादिल ।
ज्याझ्वलय् शिक्षा, विज्ञान तथा प्रविधिमन्त्री गिरीराजमणि पोखरेलं विश्वविद्यालयया छवि हे बुलुइगु कथं गल्ती मयायेत विश्वविद्यालयया पदाधिकारीपिन्त सचेत याकादिल । वय्कलं विश्वविद्यालय दुने कल्पनातकं यायेमफइकथंया बेथिति दुहांवःगु न्ह्यथनादिसें दुःख नं प्वंकादिल ।
मुँज्याय् विश्वविद्यालयया उपकूलपति प्राध्यापक डा. तीर्थराज खनियां विश्वविद्यालयपाखें नालीगु नीति व ज्याझ्वःयात कयाः जानकारी याकादिल ।
