गिरिजा प्रसाद जोशीया झ्वाता उलेज्या जुल
लहनान्युज | चौलाथ्व सप्तमी ११३८ (मार्च २४ २०१८)
नेपालभाषाया महाकवि मदुम्ह गिरिजा प्रसाद जोशीया ८० बुदिँया लसताय् शनिवाः सक्वय् थीथी ज्याझ्वः याना हंगु दु ।
उगु ज्याझ्वः संस्कृतिबिद् सत्यमोहन जोशीया मूपाहाँसुइ भाषासेवी राज दास श्रेष्ठया सक्वया कृषि फार्मय् मदुम्ह जोशीया बाम्हमं झ्वाता पलिस्था, निभाः सफूकुथि नीस्वनेगु नापं साहित्यिक ज्याझ्व जूगु दु ।
ज्याझ्वःया ग्वसाः नापं राजदास श्रेष्ठया नायःसुइ जूगु ज्याझ्वलय् विशेष पाहाँपि जनकवि दुर्गालाल श्रेष्ठ व साहित्यकार मथुरा साय्मिं सफूकुथि उलेज्या यानादीगु खः ।
तेजबहादुर लामा, विमल ताम्राकार, सौरभ शाक्य, मथुरा साय्मि, गोविन्द प्रसाद घिमिरे, रिता महर्जन, विन्दु प्रकाश जोशीपिन्सं सफूकुथिया नितिं सफू ग्वाहालि यानादीगु खः । सफू कुथियात सुथांलाक्क न्ह्याकेया नितिं विन्दु प्रकाश जोशी झिद्वः तका आर्थिक ग्वाहालि यानादीगु खः ।
अथेहे उगु ज्याझ्वलय् आख्यानया नितिं साहित्यकार मथुरा साय्मि व काव्य विधाय् जनकवि दुर्गालाल श्रेष्ठयात हनापौं नापं म्हतिं झिद्वःतका राज दास श्रेष्ठं लःल्हाःगु खः ।
सूर्य नारायण श्रेष्ठं न्ह्याकूगु ज्याझ्वलय् राम कृष्ण सिंपाखेँ लसकुस न्वचू तयादीगु खः ।
बुखँ नेवाः सूचना केन्द्र
किपा राजेन्द्र रंजित
Categorized in राष्ट्रिय
