गुथि बिधेयक बिरुद्ध थाय्मदुइ सभा
नृपेन्द्रलाल श्रेष्ठ | तछलाथ्व पुन्हि ११३९ (जुन १७ २०१९)
थौं नेवाः संघया ग्वसालय् गुथि बिधेयक बिरुद्ध येँया थाय्मदुइ छगु कोणसभा जुगु दु ।
उगु कोणसभाय् मूपाँहा कथं गुथि विधेयक विरुद्ध संघर्ष समन्वय समितिया संयोजक डा. महेशमान श्रेष्ठ झायादीगु खः ।
उगु सभाय् थःगु खँ तयादिसे संघर्ष समितिया संयोजक श्रेष्ठं संसदय् दर्ता जूगु विधेयकं गुथिया हक, जिम्मेवारी फुक्कं गुथ्याःतय्गु मजूसे प्राधिकरण नीस्वनाः उकियात लःल्हाय्त्यंगु दु । धयादिसे गुथि उकी दुने दुपिं गुथ्याःतय्त गुलि माया दइगु खः, स्वभाविक कथं मेपिन्त उलि माया दइ मखु धका धयादिगु खः ।
संयोजक श्रेष्ठं संसदय् दर्ता जूगु थुगु विधेयक पारित जुल धाःसा गुथिलिसे सम्बन्धित फुक्क थजाःगु अधिकार गुथ्याःतय्त दइमखु । स्वतः समाप्त जुइ । गुथि सञ्चालन याय्गु अधिकार फुक्क राष्ट्रियकरण जुल धाःसा थ्व लिसे सम्बन्धित जग्गा, तिसालिसे फुक्क धनसम्पत्ति नं राष्ट्रियकरण जुइ धकाः धयादिसे वयकलं थ्वहे वइगु असार ४ गते माइतीघर मण्डला वया एकताबद्ध क्यनेत दक्को संपदाप्रेमि व गुथिया व सकल नेवाः तयेत इनाप न यानादिगु खः ।
उगु सभाय् गुथि संस्थानया पुलाम्ह अधक्ष्य पंचलाल महर्जन व नेवाः संघया नायः सत्यनारायण डंगोेल नं बिधेयकया बिरुद्ध थःगु बिचाः तयादिगु खः ।
