गैरआवासीय नेपाल संघया निर्वाचन अनिश्चित
लहनान्युज | ञंलाथ्व दशमी ११४१, भाद्र ३१ बिहीवाः
गैरआवासीय नेपाल संघ (एनआरएनए) य् नं नेपाली राजनीतिया किचः लाःगु दु ।
गुकिया हुनिं एनआरएनया १०क्वःगु विश्व सम्मेलन व निर्वाचन प्रक्रिया अनिश्चित जूगु दु । संघया ३म्ह पदाधिकारीं महाधिवेशन प्रतिनिधि छनौटया झ्वलय् धाँधली जूगु धका परराष्ट्र मन्त्रालयस उजुरी बिउगु लिधंसाय् मन्त्रालयं हस्तक्षेप याना निर्वाचन प्रक्रिया दिकेत धायेधुंका संघया १०क्वःगु विश्व सम्मेलन अन्योलय् लाःगु दु ।
एनआरएनया चुनावय् हस्तक्षेप याना परराष्ट्र मन्त्रालयं वइगु कात्तिक ३ गतेया नितिं क्वजिइगु निर्वाचनया छुं नं प्रक्रिया मन्ह्याकेत धाःगु खः । परराष्ट्र मन्त्रालयया सहसचिव भरतकुमार रेग्मीं भदौ २५ गते एनआरएनएयात पौ च्वया निर्वाचन दिकेत निर्देशन बियादीगु खः ।
न्हूगु नेतृत्व ल्यःगु ३न्हूलिपा कात्तिक ६ निसें ८ गते तक्क विश्व सम्मेलन यायेगु गैरआवासीय नेपाली संघया ज्याधलः दु । एनआरएनए परराष्ट्र मन्त्रालयस दर्ता जूगु विदेशय् दूगु नेपालीतये मंका संस्था खः ।
८०गू सिवें आपा देशय् थुकिया शाखात दु । परराष्ट्र मन्त्रालयलिसे समन्वय व सहकार्य याना एनआरएनएं थःगु ज्यापहः यानावःगु दु । उजुरीया छानविन यायेत परराष्ट्र, कानून व सञ्चार मन्त्रालयका प्रतिनिधित दुथ्यागु अनुगमन समिति दयेकुगु दु ।
उगु समितिं थःगु प्रतिवेदन पेश मयातले निर्वाचनसम्बन्धी ल्यं दूगु प्रक्रियात लिछ्यायेत मन्त्रालयं धाःगु दु । परराष्ट्र मन्त्रालयया हस्तक्षेपकारी पौया व्यहोरा स्वयेबलय् आः कानून, सञ्चार व परराष्ट्र मन्त्रालयया कर्मचारी दुथ्यागु टोलीं युरोपया थी थी देय् व जापानया भ्रमण याना स्थगलत अनुगमन यायेधुंका जक एनआरएनया निर्वाचन प्रक्रिया न्ह्याये फइगु खनेदु ।
Categorized in राष्ट्रिय
