ग्वःफसं प्रभावित जूपिन्त छेँखा लःल्हात
लहना न्यूज | ने.सं. ११३९ ञलाथ्व षष्ठि (४ सेप्टेम्बर, २०१९), बुधवाः
नेपाली सेनां बारा व पर्साया ग्वःफसं प्रभावित जूपिनिगु नितिं दयेकूगु छेँ लःल्हाःगु दु ।
थौं बुधवाः पर्साया वीरगञ्जय् ग्वसाः ग्वःगु छगू ज्याझ्वःया दथुइ कार्यवाहक प्रधानमन्त्री ईश्वर पोखरेलं प्रदेश २या मुख्यमन्त्री लालबाबु राउतया दयेकूगु उगु छेँखा लःल्हानादीगु खः ।
जनताया आवास पुनःनिर्माण ज्याझ्वः अन्तरगत नेपाली सेनां दयेकूगु उगु छेँखा लःल्हायेगु ज्या जूगु खः ।
थगुने चैत १७ गते सनिलय् वःगु चक्रवातपाखें २७म्ह सीगु खःसा अर्बौैंतका बराबरया धनमाल खति जूगु खः । सरकारं चैत २१ गते क्षतिग्रस्त जूगु छेँया पुनःनिर्माण यायेगु जिम्मा नेपाली सेनायात बीगु क्वःछ्यूगु खः ।
नेपाली सेनाया २८ नं बाहिनी अड्डा नेतृत्वया कार्यदलं १२गू क्लष्टरय् ब्वथलाः स्वंगू चरणय् दयेकेज्या पूवंकूगु खः ।
बारा व पर्साया थीथी स्थानीय तगिमय् दयेकूगु जनता आवास पुनःनिर्माण ज्याझ्वः अन्तरगत नेपाल सेनां ८६९खा छेँ दयेकूगु खः । मूल्य अभिबृद्धिकर लिसें छखा छेँ ४गू लख ८४द्वः ८८८तका तूग उगु आवास दयेकेगु नितिं सरकारं ८४गू करोड ६८गू लख ७६द्वःतका उपलब्ध याकूगु खः ।
अथे हे, उगु आवास दयेकेगु ज्याय् २,६६५म्ह सैनिक व ३,६७७म्ह गैर सैनिक परिचालन याःगु खः । उगु लागाया पुनःनिर्माण, पुनःस्थापना, सहजीकरण व समन्वय यायेत नीस्वंगु समितिं साउनया लिपांगु वालय् जिम्मेवारी पूवंकेगु लक्ष काःगुली तराई–मधेसय् वःगु खुसिवाः व डुबानया हुनिं छुं दिं दयेकेज्या स्थगित याय्माःगु खः ।
ज्याझ्वलय् प्रधान सेनापति पूर्णचन्द्र थापा, प्रदेश नं. २या भौतिक पूर्वाधारमन्त्री जीतेन्द्र सोनल, बारा व पर्साया प्रमुख जिल्ला अधिकारी, स्थानीय जनप्रतिनिधिपिनिगु ब्वति दुगु खः ।
ज्याझ्वः न्ह्यः कार्यवाहक प्रधानमन्त्री पोखरेलं बाराया चैनपुरय् दयेकूगु छेँखाया अवलोकन यानादीगु खः ।
