चन्द्रागिरि नगरपालिका कन्ह्यनिसे सिल याइगु
लहनान्युज | बछलाथ्व अष्टमी ११४०, जेष्ठ २ शुक्रवाः
चन्द्रागिरि नगरपालिकाय् च्वपिं प्यम्हेसित कोरोना भाइरसया संक्रमण खन दगुलि स्थानीय निकाय, सुरक्षाकःमि व स्थानीयवासी पिन्स सुरक्षित तयेगु निंतिं पलाः ल्ह्वनेगु सुरु याये त्यःगु याःगु दु। नगरपालिकां कन्हय् न्हिनय् १२ बजे निसें जेठ ७ गते सुथय् ६ बजे तक सिल यायेगु निर्णय याःगु दु ।
चन्द्रागिरि नगरपालिकां नागढुंगाया थानकोटया राजमार्ग बाहेक मेगू फुक्कं सतकय् गाडी चले यायेत प्रतिबन्ध तःगु दु । राजमार्गय् नं एम्बुलेन्स थे जाःगु अत्यावश्यक गाडी जक चले याकेबीगु व अज्याःगु गाडीत अनया सतकय् गनं नं दिकेमबीगु खँ नगरपालिकां धाःगु दु ।
थौं च्वंगु नगरपालिकाया प्रतिनिधि व सुरक्षा अधिकारीतय् मुँज्यां चन्द्रागिरि नगरपालिकायात सिल यायेगु निर्णय याःगु खः । सिलबन्दीया अवस्थाय् वासः पसः बाहेक मेगू छुं नं कथंया पसः चायेके मदइगु जूगु दु ।
नगरपालिका पूर्णरुपं सिल यासे नगरयात सुरक्षित तयेगु निंतिं अनया झिंन्यागूलिं वडाया अध्यक्षतय् ब्रिफिङ यायेगु ज्या नं जूगु दु ।
वैशाख ३० गते नगरपालिकाय् च्वनीम्ह ३३दँया मिसायात संक्रमण खनेदुगु खः ।
