चन्द्रागिरी नगरपालिकाय् अप्पा उद्योगया विरोध व समर्थन
लहनान्युज | थिंलागा चर्तुदशी ११४० (दिसेम्वर २५ २०१९)
आदिवासी व आप्रवासीया इगो जकं खःला कि ?
राज्यया राजधानी केन्द्रित विकासे योजनां राजधानीबासीयात धाःसा समस्या दुने मेगु समस्याय् लाका यंकाच्वंगु दु । सडक दय्कूसां थन हे, फास्ट ट्र्याक नं थन हे, राज्यया दक्व धइथें ज्याकू नं थन हे । अलय् थ्व सकतां कथंया संरचना दय्केत छेँ वनी, बुँ वनी थनया आदिवासीया हे । अलय् राजधानीं तापाक्क गामय् च्वंपिनि नं समस्या हे । छुं नं सिफारिस काय्माःसा वा छुं नं सरकारी ज्याखँ पूवंकेत राजधानीइ हे वय्माःगु ।
लजगाःया ह्वःताः मदुगु हुनिं नं अवसर मालेत राजधानीइ हे वय्माःगु । संघीयता वय्धुंकाः थजाःगु परिस्थिति मदइगु आशा दुगु खः, तर आःतक ला छुं कथंया ह्यूपाः महसूस याय् मखंनि । बरु देय्न्यंकया मनूत राजधानीइ हे कात्तुकाकाः च्वनेमाःबलय् आदिवासी व आप्रवासी दथुइया समस्या धाःसा तःधना वन । आप्रवासीयात सतक मगाःसा आदिवासीया छेँ थुनेमाःगु, आदिवासीया उद्योग, व्यापारं आप्रवासीया समस्या जुल धाःसा बन्द याय्माःगु ।
थुकिया लिपांगु दसू चन्द्रागिरी नगरपालिका दुनेया अप्पा भट्टा उद्योग जूगु दु । पिनें वःपिं आप्रवासीतय्सं अन न्ह्यानाच्वंगु अप्पा उद्योग बन्द याय्माल धकाः चन्द्रागिरि नगरपालिकायात ज्ञापनपौ लःल्हाःगु दुसा स्थानीय आदिवासीं उद्योगं थःपिन्त छुं हे आपत्ति मदुगु धासें ध्यानाकर्षण पौ ब्यूगु दु ।
येँ चन्द्रागिरी नगरपालिका दुने सतुङ्गल ,बलम्बु क्षेत्रय् न्ह्यानाच्वंगु अप्पा उद्योगी, मजदुर व उगु हे थाय्या रैथाने स्थानीय बासिन्दा आन्दोलनय् कुहांवःगु दु । मेथासं बाय् हिलाः थौंकन्हय् उगु क्षेत्रय् च्वंवंपिं न्हूपिं बासिन्दातसें अप्पा भट्टा चीकेमाःगु माग यासें चन्द्रागिरी नगरपालिकाय् ज्ञापन पौ लःल्हाय्धुंकाः स्थानीय बासिन्दा आन्दोलित जूगु खः । थःपिनिगु जाप्यः लाका काय्त स्वःगु धासें भट्टा संचालक उद्योगी, मजदुर व अनया स्थानीय बासिन्दां वंगु शुक्रबाः आन्दोलन न्ह्याकूगु खः ।
थःगु ज्या यानाः याउँक म्वाय् दय्माःगु माग च्वयातःगु प्लेकार्ड, ब्यानर ज्वनाः द्वलंद्वःया ल्याखय् मनूत प्रदर्शनय् कुहांवल । स्थानीय अप्पा भट्टा उद्योगया समर्थनय् जूगु प्रदर्शनय् परम्परागत बाजंलिसें मौलिक भेषभुषाय् स्थानीयया नं उलि हे ल्याखय् ब्वति दुगु खः ।
‘सरकारं क्वःछ्यूगु मापदण्ड दुने च्वनाः वातावरणय् प्रतिकूल लिच्वः लाइगु खँयात तकं बिचाः यानाः न्हूगु अत्याधुनिक प्रविधियात नालाः जिमिसं उद्योग न्ह्याकाच्वनागु दु’ ब्वज्याय् कुहांवःम्ह छम्ह प्रदर्शनकारीं धाल, ‘छुं सीमित मनूतसें थःगु निहीत स्वार्थया नितिं भ्रामक प्रचारबाजी यानाः उद्योगय् आश्रित द्वलंद्वःया मजदुरतय्त बिचल्ली याय्त स्वःगु जक मखु, स्थानीयं दंदँ न्ह्यःनिसें न्ह्याकावःगु उद्योग बन्द यानाः भारतं आयात याय्त स्वयाच्वंगु कमिसनया कासा नं खः थ्व ।’
सतुंगः, बलम्बु क्षेत्रय् थौंकन्हय् १२गू अप्पा उद्योगय् ६द्वःम्ह स्वयां आपाः मजदुरत ज्या यानाच्वंगु दुगु उद्योगीतय् धापू दु । अप्पा उद्योग न्ह्याकेत स्थानीयया समर्थन दु धकाः च्वयातःगु प्लेकार्ड, ब्यानरलिसें प्रदर्शनय् कुहांवःपिं मजदुर, उद्योगी, स्थानीयं नगरपालिका वनाः ध्यानाकर्षण पौ नं लःल्हाःगु खः ।
