चर्या नृत्य सम्बन्धि कार्यशाला क्वचाल
लहनान्युज | बछलाथ्व षष्ठी ११३८ (अप्रिल २१ २०१८)
नृत्य निर्देशक संघ नेपाल, यल कचां ग्वसालय् चर्या नृत्य सम्बन्धि कार्यशाला गोष्ठीया यलय् औपचारीक समापन जुगु दु ।
कचां यलय् छगू ज्याझ्वःया ग्वसाः ग्वयाः वंगु वैसाख २ गतेनिसें न्ह्याःगु कार्यशाला गोष्ठीया औपचारीक समापन याःगु खः । ज्याझ्वलय् न्वःवासें चर्या नृत्य प्रशिक्षक प्रज्वलरत्न बज्राचार्यं नृत्यकारपिन्सं चर्याया लिसें हरेक नृत्यया हावभाव कण्ठ यानाः प्याखं ल्हुइगु जक मयाःसे उकिया अर्थ तकं थुइका कायेमाःगु धयादिल । चर्या नृत्य, साधारण नृत्य जक मखसें जीवन दर्शन हे खःगु बज्राचार्यया धापू खः । नृत्यया मुद्रायागु अर्थ नं थुइकाः प्याखं ल्हुइगु याःसा उकिं स्वस्थ्य जीवनया शिक्षा नं समाजयात बीफइगु बज्राचार्यया धापू खः ।
अथे हे, संघया केन्द्रीय न्वकू संजय शर्मा राजोपाध्यायं सनातनी हिन्दु समाज दुने नं चर्या नृत्यया पुनर्जागरण यायेमाःगुलिइ बः बियादिल । न्वकू राजोपाध्यायं न्हापा हिन्दु समुदाय दुने नं चर्या नृत्यया चलन दुगु तर आः वयाः लोप जुयावंगु धयादिल ।
अक्षयश्वर महाविहार संरक्षण समितिया नायः राजेश शाक्य व यल महानगरपालिका १६ वडाया वडाध्यक्ष निर्मलरत्न शाक्यं कला व कलाकारीता ख्यःया समग्र विकासया लागिं थःपिन्सं फक्व ग्वाहालि यायेगु प्रतिवद्धता प्वंकादिल ।
ज्याझ्वलय् गोष्ठीया ब्वतिमिपिन्त यल महानगरपालिका १६ वडाया वडाध्यक्ष निर्मलरत्न शाक्यं दसिपौ लःल्हानादिल । उगु हे ज्याझ्वलय् कार्यशाला गोष्ठीया ग्वसाः ग्वयेत ग्वाहालि याःगु अक्षयश्वर महाविहार, प्रशिक्षक प्रज्वलरत्न बज्राचार्ययात संघया केन्द्रीय नायः भुवनदास श्रेष्ठं सुभाय् पौ लःल्हानादिल । ज्याझ्वलय् कलाकार रीता व्यन्जनकारं चर्या नृत्य नं न्ह्यब्वयादीगु खः ।
विश्व नेवाः सम्मेलनय् ब्वति कायेत बज्राचार्य नेपाल झाःगु व्हःताः लाकाः संघं कार्यशाला गोष्ठीया ग्वसाः ग्वःगु खः ।
