चलचित्र विकास बोर्डंया १९ दँया लसताय् हने ज्याझ्वः
चलचित्र विकास बोर्डंया १९क्वःगु वार्षिक उत्सवया लसताय् बोर्डया प्रेक्षालय हलय् १४ म्ह चलचित्रकःमिपिन्त ‘चलचित्रकःमि विशिष्ट योगदान सम्मान २०७६’ पाखें सम्मानित याःगु ।
प्यंगू चलचित्र भवनयात विशिष्ट योगदान सम्मान, विशेष चलचित्रय् छनोट जूगु स्वंगू चलचित्र, डिजिटाइजेशन व रेस्टोरेशन प्राविधिक समिति व बोर्डया कर्मचारीपिन्त सम्मानित याःगु दु ।
नेपाली चलचित्र क्षेत्रय् २० निसें ५० या दशक तक थीथी क्षेत्रय् उल्लेखनीय योगदान याःपिं अग्रणी चलचित्रकःमिपिन्त विशिष्ट योगदान सम्मानपाखें सम्मानित यायेगु निर्णय चलचित्र विकास बोर्डं याःगु खँ बोर्डया अध्यक्ष केशव भट्टराई नं धयादिल । ५० या दशक नेपाली चलचित्रया सुरुवातनिसें आःतक नं निरन्तर योगदान यानाच्वंगु ठहर यासें निर्देशकपिंपाखें लक्ष्मी नाथ शर्मा, मिस्तपाखें नायिकापाखे न्हापांगु नेपाली चलचित्र “आमा”पाखें अभिनय यात्रा सुरु यानाः आःतक नं निरन्तर योगदान बियाच्वनादीम्ह न्हापांम्ह अभिनेत्री भुवन चन्दयात, संगीतपाखे बरिष्ट संगीतकार शम्भुजीत बासकोटा सम्मान याःगु खः ।
अथेहे, नृत्य निर्देशनपाखें बरिष्ट नृत्य निर्देशक बसन्त श्रेष्ठ, द्वन्द्व निर्देशक राजेन्द्र खड्गी,बरिष्ठ छायाँकार मञ्जुकुमार श्रेष्ठ, बरिष्ठ ध्वनीविज्ञ प्रदीपकुमार उपाध्याय, बरिष्ठ चलचित्र निर्माता छविराज ओझा ,चलचित्र पत्रकारितापाखे २०४० या दशकनिसें आःतक निरन्तर चलचित्र पत्रकारिता यानाः योगदान यानादीगु बापत बरिष्ट चलचित्र पत्रकारलिसें बरिष्ठ चलचित्र निर्देशक व बिजयरत्न तुलाधर असंबरेयात नं थ्व सम्मानपाखें सम्मानित याःगु दु ।
अथेहे तुं आःतक झीनिसः स्वया अप्वः नेपाली चलचित्रया पोष्टर डिजाईन यानाः योगदान यानादीगु बापत बरिष्ट डिजाईनर सुन्दर श्रेष्ठ, विज्ञापन निर्माणय् योगदान याःगु बापत बरिष्ट व्यक्तित्व निर्मलराज पौडेलयात विशिष्ट योगदान सम्मानपाखें सम्मानित याःगु दु ।
विदेशी जुयाः नेपालय् चलचित्र निर्देशन यानाः नेपाली भाषा, साहित्य, कला, सँस्कृति व भूगोलयात अन्तर्रा्ष्ट्रिय जगतय् परिचित याकेत योगदान यानादीगु बापत जापानी नागरिक डा. तोसिआकी इतोहयात विशेष सम्मानपाखें सम्मानित याःगु दु । चलचित्र पत्रिका कामनायात नं बिशेष सम्मान लःल्हाःगु दु ।
Categorized in
मनोरन्जन
