चाःबहिलय् दिप दयेकेगु ज्या न्ह्या
लहानान्युज | कौलाथ्व पंचमी ११४०,कार्तिक ५ बुधवाः
चाःबहिलय् च्वंगु शाक्यतय्गु परम्परगत दिप दयेकेगु ज्या न्ह्याःगु दु। उगु वःगु बिहीवाः दिप दयेकेगु तयारी याःगु खःसां नं पिने वयाः उगु लागाय् छेँय् दनाः च्वंवःपिंसं पंगः थःगुलि दिप दयेकेगु ज्या स्थगित जूगु खः ।
दिप लिसे सम्बन्धित व वडा कार्यालयय् सहलह जूगु खःसा वयां लिपा दिप दयेकेगु ज्या स्थगित यायेगु सहमति जूगु खः ।
उगु दिप दयेकेगु बारे येँ महानगरपालिकाया मेयर विद्यासुन्दर शाक्य व पिनें वयाः च्वनाच्वंपिनि दथुइ मेयरया ज्याकुथीइ हे सहलह जूगु खः। उगु सहलहय् खँ मिले मजुइवं मेयर शाक्यं काठमाण्डौं जिल्ला प्रशासन कार्यालययात सुरक्षा बीत इनाप यानादीगु खः ।
थौं दिप दयेकेगु ज्या जुयाच्वंगु थासय् प्रहरीं सुरक्षा बिःगु दु। दिप दयेकेगु निति येँ महानगरपालिकाया बजेटं दयेकेगु ज्या न्ह्याःगु खः। दिपया डिजाइन तक येँ मनपां पारित याये धुंकूगु दु।
शाक्यतय् सी उइगु थ्व दिपय् सी उइगु इलय् निक्वः तक ल्वापू जुगु खः। दिप लिक्क छेँय् च्वपिन्स थनेगु कुतः यायेवं स्थानीय मनूत, सीगुथिया मनूत जानाः प्रतिकार यानाः सी उइगु यायेमालाच्वंगु खः । आः दिपः दयेकेगु ज्या याःबलय् नं पंगः थनेगु कुतः जुइवं स्थानीय मनूत प्रतिकारय् कुहांवःगु खः ।
शुक्रवाः निथ्व दथुइ झडप जुइगु अवस्था वयेवं वडा ज्याकुथिइ सहलह यानाः सोमवाः तकया निंतिं दिप दयेकेगु ज्या दिकेगु सहमति जूगु खः ।