चितवनया बजाः खुला, ठेला व घुम्ती पसः रोक
चितवनया जिल्ला प्रशासन कार्यालयं पसः व जोर विजोर प्रणालीइ यातायात सञ्चालन खुला जुइ कथं निषेधाज्ञा छ्वासुकू दु ।
 
कार्यालयं थौं बुधवाः छगू सूचं जारी याना निजी व सार्वजनिक यातायात जोर विजोर प्रणालीइ सञ्चालन यायेगु निर्णय याःगु खः ।
 
अथेहे तरकारी, फलफूल व खाद्यान्न पसः सुथसिया ६ बजे निसे बहनि छ बजे तक व मेगु पसः सुथय् १० बजे निसे बहनि ५ बजे चायेके दइ जूगु दु ।
 
तर सिनेमा हल, स्वीमिङ पुल, जिमखाना, स्पा, फुटसल, पुस्तकालय, संग्रहालय, ब्युटीपार्लर, सैलुन व हाटबजार सञ्चालन याये दइ मखु । ठेला, रिक्सा लगायत घुम्ती पसः, पानीपुरी, चटपटे लगायतया फास्टफुडया व्यापार न याये दइ मखु ।
 
पर्यटन विभागपाखे स्वीकृति कया पर्यटकस्तरीय होटलं पर्यटन बोर्डं तोके याःगु मापदण्ड पालना याना विदेशी व स्वदेशी पर्यटक तये दइ ।
 
अथेहे होटलया हकय् आइसोलेसन व क्वारेन्टिन प्रयोजन बाहेकया मेगु होटल सञ्चालन याये दइ मखु । टेक अवे सेवा धाःसा राजमार्ग थासय् रेस्टुरेन्ट बहनि १० बजे तक व मेगु थाय् या रेस्टुरेन्ट बहनि ८ बजे तक सञ्चालन याये दइ धका जिल्ला प्रशासन कार्यालयं आदेशय् उल्लेख याःगु दु ।