चित्तधर सिरपाः लःल्हात
नृपेन्द्रलाल श्रेष्ठ | तछलागा एकादशी ११३८ ( जुलाई ९ २०१८ )
नेपालभाषा परिषदया ग्वसालय् कविकेशरी चित्तधर हृदयया ११२ क्वःगु बुन्हिया लसताय् थौं सोमवाः छगु ज्याझ्वः दथुइ चित्तधर सिरपाः लःल्हाःगु दु ।
नेपालभाषाया साहित्य ख्यलय् तसकं प्रतिष्ठित सिरपाः व सम्मान कथं भाषा, साहित्य ख्यलय् ज्वःमदुग योगदान बियाच्वपिन्त भाषाथुवाः उपाधि बिइगु याना वयाच्वंगु खः । थसुगुसि साहित्यकार यज्ञरत्न धाख्वाःयात थुगु सम्मान देछाःगु खः ।
मूपाहाँ वाङमय शताब्दी पुरुष संस्कृतिविद् डा. सत्यमोहन जोशीं थौं उगु ज्याझ्वलय् सम्मानित जुयादीपिन्त हनापौ देछानादीगु खः ।
थौंया ज्याझ्वलय् डा. योगेन्द्र प्रधानयात चित्तधर सिरपाः, डा. पुष्पराज राजकर्णिकारयात ठाकुरलाल सिरपाः, लोचनतारा तुलाधरयात मोतीलक्ष्मी सिरपाः, अनिता तुलाधरयात केशवलाल बाखं सिरपाः व मोतिलक्ष्मी शाक्ययात पूर्णहेरा सिरपाः देछाःगु खः ।
परिषदया नायः प्रा. सुवर्ण शाक्यया सभानायःसुइ न्ह्याःगु उगु ज्याझ्वलय् रसियन सेन्टर अफ साइन्स एण्ड कल्चरया निर्देशक मय्जु लुलिया एन्ड्रोशोभा विशेष पाहाँ कथं झायादीगु खः ।
ज्याझ्वलय् थःगु नुगःखँ तयेगु झ्वलय् मूपाहाँ शताब्दी पुरुष जोशीं नेपालभाषा परिषदय् नेपालभाषाया साहित्य बिकास यायेत एकेदेमी माःगु बिचा वःगुलि हे चित्तधरया बिचाः कथं थौं नेपालभाषा एकेदेमी पलिस्था जुगु बिचा तयादीगु खः ।
मूपाहाँ शताब्दी पुरुष डा.जोशीं योगवीर सिंह कंसाःया काव्य कृति “योगमाया”या न पितब्वज्या यानादीगु खः ।