चिनियाँ सिछ्वान टोलीपाखें स्वास्थ्य शिविर
राजेश बज्राचार्य | ने. सं. ११३८ थिंलागा नवमि (डिसेम्वर ११, २०१७) येँ
सिछ्वान प्रान्तपाखें थ्यंगु २०म्हेसिया मेडिकल टोलीया प्रतिनिधि डा. चेन चे नापं नेपाःया १४ डाक्टर, नर्स व स्वास्थ्य स्वयंसेवीया टोलीपाखें यल व काभ्रे जिल्लाया थीथी गाँमय् सोमवाःनिसें ६न्हूयंक निशुल्क स्वास्थ्य शिविर जुइगु जूगु दु ।
अरनिको समाजं आइतवाः छगु समारोह यासें थुगु टोलीयात लसकुस नापं शिविर ज्याझ्वःया जानकारी ब्यूगु खः । समाजया ग्वसालय् धुलिखेलया बडालगाँमय् मंसीर २५ व २६ गते, यलया बाडेगाँ लाछीइ २७ गते, लूभुइ २८ गते, प्यूटार गाँमय् २९ गते व पुष १ गते खोकनाय् थुगु शिविर जुइगु जूगु दु ।
ज्याझ्वःसं सिछ्वान प्रान्तिय सरकारया अन्तर्राष्ट्रिय शाखा उप प्रमुख ह ग्वान शियानं नेपाःलिसेया मैत्रीय सम्बन्धयात स्वास्थ्य सेवापाखें निरन्तरता बिइखंगुलिइ हर्षित जुयादिल । ं
मू पाहाँकथं झायादिम्ह धुलिखेल नगरपालिकाया प्रमुख अशोक ब्याँजुं अरनिको समाजमार्फत तःभूखाय्बलय् दकले न्हापां थुगु प्रान्तपाखे स्वास्थ्य सहयोग प्राप्त जूगु लुमंकादिल । ‘वहे अनुभवी स्वास्थ्यकर्मी टोली हाकनं वया स्वास्थ्य सेवाया निरन्तरता जुइगु तसकं लसताया विषय खः’ वयेकलं धयादिल, ‘थुजोगु ज्याझ्वःया निरन्तरताया लागि सिछ्वान प्रान्तया छगु नगर वा अस्पताललिसे धुलिखेल नगरपालिकाया भगिनी सम्बन्ध स्थापना यायेत नगरपालिका तयार दु ।’
ज्याझ्वःसं चिनियाँ राजदूतावासया प्रतिनिधिकथं झायादिम्ह आर्थिक कन्सुलर याँङ्ग सि छुं नेपाली समाजया स्वास्थ्य क्षेत्रय् नं चिनियाँ ग्वाहाली निरन्तरता बिइखंगु खँय् लसता प्वंकादिसें धयादिल, ‘चीनया न्हापांगु स्वास्थ्य शिविरय् जूगु म्हो उपस्थितिया तुलनाय् लिपाँगु इलय् तिब्बतया सिझांगया टोलीसहित मुस्तांगय् जूगु १०न्हूया शिविरय् दैनिक च्याःसम्ह लाभान्वित जूगु खबर वःगु दु । थ्वः सेवाभाव व विश्वासया न्ह्योने भाषा समस्या मजूगुया दसू खः ।’ वयेकलं नेपाःया प्रतिनिधिसभा व प्रदेशसभाया चुनावलिपा देय् सम्बृद्धि व विकासया लँपुइ न्ह्यज्यायेगु नापं मैत्रीय सम्बन्ध थुजोगु सेवामूलक ज्याझ्वःपाखें अझ प्रगाढ जुइमा धैगु कामना यानादिल ।
समाजपाखें डा. शुशील प्रजापति व डा. उर्मिला शाक्यजुं लसकुस यानादिगु थुगु ज्याझ्वःसं सिछ्वान अस्पतालया लि जुँ ह्वा, नेपाल सरकार जिल्ला जनस्वास्थ्य शाखा अधिकृत झलक शर्मा पौडेल लगायतया उपस्थिति दुगु खः ।
२०७२ सालया तःभूखाय् अवस्थाय् नेपालय् वःगु थीथी सहयोग मध्ये अरनिको समाजया पहलं दकले न्हापां सिछ्वान व छोन्चिङ्ग प्रान्तपाखें स्वास्थ्य टोली थ्यंकवःगु खः । सन् १९८१निसें सक्रिय अरनिको समाजं चीनया भाषा, सँस्कृति नेपालय् परिचित याकेगुनिसें शिक्षा, विज्ञान, प्रविधि व आवश्यक प्राविधिक ज्ञान कालबिल यायेगु ग्यसुलाःगु ताँ कथं ज्या यानावैच्वंगु दु । समाजं इलय्ब्यलय् चीनया थीथी थासय् अध्ययन, प्र्र्शिक्षण व अवलोकन भ्रमणया ग्वसाः ग्वयेगु यानावैच्वंगु दु ।
