२०८० चैत्र १६, शुक्रबार

चिबाखं “बोली बचन”

– ज्ञानीराजा मानन्धर
 
नेपालय् हाकनं नाकाबन्दी जुइत्यन धइगु हल्ला न्यनाः खालिगु ग्यास सिलिण्डर छगः ज्वनाः हथासं ब्वाँय् वना, न्ह्याबलें कयाच्वनागु पसलय् । तर पसः मचाः । आः खालि सिलिण्डर ज्वनाः छेँय् लिहाँ वन कि महाभारत हे जुइगु थुइकाः अनसंतुं च्वंगु छगू किराना पसलय् दुहाँ वना । पसलय् मिसाम्ह छम्ह च्वनाच्वंगु । ग्यास दु धाल । दुने गोदामय् थःम्हं हे का हुँँ धाःगुलिं दुहाँ वना । ग्यास ला कोथा छकू जाय्क हे खन । यच्चुसे पिच्चुसेच्वंगु सिलिण्डर छगः ल्यया । पर्सं धेबा लिकयाः बीत्यनाबलय् पिनें मिजंम्ह छम्ह थ्यंकः वल । पसःया साहु जुयाच्वन ।
 
म्हमस्यूपिन्त ग्यास बीत्यंगु सियाः वं कलाःम्हेसित लाक्वः म्हुतु वात । वं म्हुतु वाःगु खनाः जितः मछिंथें च्वनावल । जि ताःहाकः हालामच्वंसें अनं पिहाँ वया । 
 
वया चुलिंचू न्ह्यःने नं छगू किराना पसः खन । अन वनाः पसल्यायात न्यना “साहुजी ग्यास दुला थें ?” 
 
पसल्यां लिसः बिल “दु । ग्यास जक माःगु ला छितः ? मेगु नं छुं माःसा धयादिसँ । नाकाबंदी जुइत्यंगु दु । छुं ठेगाना मदु नेपालय् । माःगु सामानत भचा यंकाः तयादीसां छुं पाइमखु ।” धकाः मिजासं धाःबलय् जिगु मन घ्यःथें नाइसे च्वनावल । 
“ज्यू हस् !” धयाः लच्छित गाक्क सामानत फुक्क अनं हे न्याना यंकेगु क्वःछिना । छेँय् काय् भाजुयात फोन यानाः सःता ।
 
जाकि, बजि, चि, चिकं व मसलात फुक्क न्याना । काय् फुक्क सामानत स्कूटरय् न्ह्यःने तयाः न्ह्याःवन ।  
 
जिं ग्यास छगः खिपतं चिनाः मोटर साइकलं वनेत्यनाबलय् न्ह्यःने पसलय् छक्वः मिखा ब्वया । पसल्यां जितः पुलुपुलु स्वयाच्वन ।