चीनं नेपाली भूमि अतिक्रमण याःगु निष्कर्षनापया प्रतिवेदन सीमा अध्ययन कार्यदलं नेपाल सरकारयात लःल्हाःगु खुलासा जूगु दु ।

बीबीसी विश्व सेवां थःत चूलाःगु प्रतिवेदनयात हवाला बियाः हुम्लाय् चीनं नेपाली भूमि अतिक्रमण याःगु धागु दु । नेपाःया सरकारी स्तरं उत्तरी छिमेकीं सीमा त्यःगु निष्कर्ष न्हापांखुसि वःगु न वीवीसीं धागु दु ।

चीनं सीमा त्यःगु धइगु अपुष्ट खबरत सार्वजनिक जुइवं सरकारं वंगु असोजय् सरकारी अधिकारीत, विज्ञ व सुरक्षा निकायया प्रतिनिधिनापया ज्यासना पुचः दयेकूगु खः । उगु पुचलं स्थलगत निरीक्षण यानाः सीमा त्यःगु धइथें विवरण उल्लेख यानाः प्रतिवेदन सरकारयात लःल्हाःगु खः ।

हुम्लाय् चिनियाँ पक्षं नेपाःयापाखे सिमाना त्यलाः भौतिक संरचना न दयेकातःगु प्रतिवेदनय् उल्लेख यानातःगु दु । तर नेपाल सरकारं उगु प्रतिवेदन धाःसा आःतक सार्वजनिक मयाःनि । नेपाः व चीनदथुइ द्वछि व ४सः किलोमिटर ताःहाकःगु सिमाना दु ।

उकि मध्ये उप्वः धइथें थाय् न्ह्याब्लें च्वापुं त्वःपुयाः च्वनीगु जुयाः निरन्तर सीमाना अनुगमन मयाः । हुम्लाया लालुङजोङनापया सिमा लागाया नेपामिपिन्त चिनियाँ सुरक्षाकःमिपिन्सं धार्मिक गतिविधिइ तकं प्रतिबन्ध तयाःतःगु धागु दु ।

हिन्दु व वौद्धमार्गीतय्गु आस्थाया केन्द्र कैलाश पर्वत लिक्कया उगु थाय् जुयाः मनूत धार्मिक यात्राय् वनेगु याः । तर चीनं उगु लागाय् तजाःगु पःखाः दनाः नेपाली भूमि त्यलाःतःगु दुसा सडक व खुचा तकं दयेकातःगु प्रतिवेदनय् उल्लेख यानातःगु दु ।

प्रतिवेदनय् नेपाल सरकारयात सीमा लागाय् सुरक्षा पोस्ट तयेत छ्याता ब्यूगु अले नेपाः व चीन निगुलिं देशं थ्व सिमाना सम्बन्धीया कचवं ज्यंकेत धागु दु । चिनियाँ बजारय् आश्रित सीमा लागाया नेपालमित धाःसा सिमाना त्यःगु विषयलय् नवाये चाहे मयाःगु प्रतिवेदनय् उल्लेख यानातःगु दु ।

Categorized in राष्ट्रिय