चीनपाखें छ्वयाहःगु थप खोप येँ थ्यन
दिल्लाथ्व त्रयोदशी ११४१,साउन ७ बिहीवाः
चीनपाखें छ्वयाहःगु ८ लख डोज भेरोसेल खोप येँ थ्यंगु दु । म्हिगः बेइजिङ वंगु नेपाल वायु सेवा निगमया जहाजं न्हिनय् खोप ज्वनाः वइगु धाःगु दु ।
थौं हे हाकनं जहाज खोप कायेत बेइजिङ वनीगु निगमं न्ह्यथंगु दु । कंस ९ गते वनीगु जहाजं १० गते हाकनं खोप नेपाल हइ । थ्वयां न्ह्यः, असार २५ गते ८ लख मात्रा खोप चीनं हःगु खः ।
चीनं नेपालयात अनुदानय् तँसा १६ लख डोज खोप बीगु प्रतिबद्धता न्ह्यथंगु दु । छुं दिं दुने हे अनुदान व खरिद याःगु यानाः २५ लख डोज खोप वइगु स्वास्थ्य मन्त्रालयं न्ह्यथंगु दु ।
थ्वयां न्ह्यः, चीनं १८ लख डोज खोप अनुदानय् ब्यूगु खः । अथे हे, कोरोनाविरुद्धया खोप अभियानअन्तर्गत अमेरिकी सरकारं उपलब्ध याकूगु जोन्सन एण्ड जोन्सन खोप आःतक्क ८१द्वः स्वयां अप्वःसिनं कायेधुंकूगु दु ।
जोन्सन एण्ड जोन्सन खोप अभियान आः वाग्मती प्रदेश व गण्डकी प्रदेशय् जक सञ्चालन जूगु स्वास्थ्य मन्त्रालयं न्ह्यथंगु दु ।
Categorized in राष्ट्रिय
