चीनयाके न्याना हःगु ८गू लख डोज खोप नेपाः थ्यन
लहनान्यूज | बछलागा पञ्चमी, ११४१, असार २५ शुक्रबाः
नेपाल सरकारं चीनंपाखें ८गू लख कोरोनाया खोप हःगु दु ।
नेपाल एयरलाइन्सया वाइडबडी जहाजपाखें भेरोसेलया ८गू लख डोज खोप नेपाः थ्यंकूगु खः । सरकारं चीनया सिनोफार्म कम्पनीलिसे ४०गू लख डोज खोप न्यायेगु सम्झौता याःगु खः ।
उगु सम्झौता कथं भेरोसेल खोपया न्हापांगु डोज थौं सुथय् येँ थ्यंगु दु । स्वास्थ्य सेवा विभागया खोप शाखाया प्रमुख डा. झलक शर्मा गौतमं थौं ८गू लख डोज भेरोसेलया खोप थ्यंगु खःसां ल्यंदुगु खोप साउनया न्हापांगु वालय् थ्यनीगु धागु दु ।
साउन ८ गतेदुने खरिद सम्झौता यानाः ल्यंदुगु खोप स्वंगः जहाजपाखें नेपाः हइगु स्वास्थ्य तथा जनसंख्या मन्त्रालयं धागु दु । न्हापांगु डोजया खोप हयेत वाइडबडीया जहाज बिहीवाः सलिनय् बेइजिङ ब्वःगु खः ।
थ्व खोप ६०दँ स्वयां क्वयेया वैंश पुचःयापिन्त प्राथमिकता बियाः तयेकेगु मन्त्रालयं तयारी याःगु दु ।
Categorized in राष्ट्रिय
