चीनय् खुसिबाः वल
दिल्लाथ्व द्धादशी ११४१,साउन ६ बुधवाः
मध्य चीनय् वःगु खुसिबाःया हुनिं म्होतिइ १२म्ह सीगु दु ।
खुसिबाःया हुनिं हेनान प्रान्तय् १०द्वः सिवें आपा मनूतयेत सुरक्षित थायेपाखे चिइकुगु बीबीसीं न्ह्यथंगु दु । तच्वकं वाः वयेधुंका वःगु खुसिबाःया हुनिं सडक लिसें आवास क्षेत्रत डुवानय् लायेधुंका सर्वसाधारणयात सुरक्षित थायेपाखे चिइकुगु खः ।
खुसिबाःया हुनिं सीपिं झन्झझु शहरया जूगु धाःगु दु । खुसिबाःया हुनिं छगू दर्जन सिवें अप्वः शहरया सडक व हवाइ यातायात सेवा प्रभावित जूगु दु । आपा जनसंख्या दूगु उगु प्रान्तय् अझं ३न्हू तक्क वाः वइगु धासें सचेत जुइत अधिकारीतयेसं इनाप याःगु दु ।
खुसिबाःलं सर्वसाधारणया छेँलिसेंया मेमेगु भौतिक संरचनाय् तकं क्षति याःगु दु । वाः मदिउगुलिं अझं भौतिक संरचनाय् क्षति जुइ फइगु धासें सचेत जुइत मौसम विभागया अभिकारीतयेसं इनाप याःगु दु ।
खुसिबाःलं लिच्वः लाःपिं सर्वसाधारणयात सुरक्षाकर्मीं सुरक्षित थायेपाखे यंकाच्वंगु लु सामाजिक सञ्जालय् पोष्ट जुयाच्वंगु दु । सुरक्षाकर्मीं खुसिबाःलय् तक्यंपिनि उद्दार न्ह्यानाच्वंगु न्ह्यथंगु दु ।
Categorized in अन्तर्राष्ट्रिय
