चीनय् ब्वंवनेत्यंपिं ब्वंमि व पदाधिकारीलिसे अन्तरक्रिया
लहनान्युज | बछलाथ्व एकादशी ११३८ (अप्रिल २६ २०१८)
अरनिको समाजया ग्वसालय् येँया नेपाः ब्यांक्वेट खुसिबुँइ छगू अन्तरक्रिया ज्याझ्वः जुगु दु ।
उगु ज्याझ्वलय् चीन सिछुवान कृषि विश्वविद्यालयया पदाधिकारीपिं व उगु विश्वविद्यालयस वनेत्यंपिं नेपाःया ब्वंमिपिन्त अरनिको समाजपाखें भिंतुना देछाःगु दु ।
कृषि विश्वविद्यालयया पदाधिकारी व उगु विश्वविद्यालयस ब्वंवनेत्यंपिं नेपाःया ब्वंमिपिं दथुइ थीथी विषयस अन्तरक्रिया ज्याझ्वः नं याःगु दु ।
नापं विशेष पाहाँकथं झायादीम्ह चीन सिछुवान कृषि विश्वविद्यालयया प्रमुख Xia Xinrong व अन्तराष्ट्रिय विभागया प्रमुख Zhou Zheng Zheng पिन्सं ब्वमिंपिन्त सहज जुइकेया निति उगु विद्यालयया सिष्टम, अनुशासन आदिया बारे न्वचू तयादीगु खः ।
चीनया विश्वविद्यालयया नियम कथं दच्छिया दुने चिनियाँ भाय्या ४ गू ग्रेड पास यायेहे माःगु यदि यायेमफुत धाःसा लिहाँहे वयेमालिगु खःसा ५ गू ग्रेड पास यायेफत धाःसा थःत यःगु विषय ब्वने दैगु खँनं प्रमुखं न्ह्यथनादीगु दु ।
अरनिको समाजया नायः डा. सर्वाेतम श्रेष्ठया मुँज्या नायःसुइ न्ह्यागु उगु ज्याझ्वलय् समाजया न्वकू डा. मनोजमान श्रेष्ठपिन्सं थः मांअबुपिसं चांन्हिं मधासे दुःखसियाः कमाय्यानातःगु वा छेँ–बुँ मियाः जूसां ब्वंके छ्वगु सितिं मवंक अनुशासित ढंगं थःगु, मां–अबु नापं नेपाः देय्या हे नां तयेफयेक ब्वनाः लिहां वयेत इनाप यासे भिंतुना बियादिसे चीनया शिक्षा नीतियात कयाः न्ववानादीगु खः ।
बुखँ नेवाः सुचना केन्द्र
Categorized in राष्ट्रिय
