चुनावी प्रचारया व्यस्त जुल अजयक्रान्ति नं
न्ह्यःने वयाच्वंगु प्रतिनिधिसभा व प्रदेश सभा निर्वाचनय् चुनावी लिच्वः थःगु पक्षय् लाकेत उम्मेदवारपिं सकलें चुनावी प्रचारय् व्यस्त जुयाच्वंगु दु । थ्व हे झ्वलय् येँ क्षेत्र प्रदेश सभा नम्बर–९‘क’य् बाम गठबन्धनपाखें प्रत्यक्षय् उम्मेदवारी ब्यूम्ह डा.अजयक्रान्ति शाक्यया चुनावी प्रचार अभियान नं तच्वयाच्वंगु दु ।
थ्वयां न्ह्यः विशेष रुपं संगीतकार कथं नेवाः समुदाय दुने नांजाःम्ह शाक्य थुगुसी न्हापांगु खुसी प्रत्यक्ष रुपं चुनावी मैदानय् कुहांवःगु खः । थ्वयां न्ह्यः चुनावी ख्यलय् खनेमदुनिम्ह शाक्य राजनैतीक दलया उम्मेदवार कथं थौंकन्हय् छेँखा अभियानय् जनताया छेँय् छेँय् थ्यंबलय् जनताया दथुइ उत्साह नं खनेदुगु दु । डा. शाक्य छेँखा अभियानय् वनेगु झ्वलय् विशेष यानाः उगु क्षेत्रया मतदातापिनिगु समस्या न्यनेगु, समाधानया विषयस, उगु क्षेत्रय् आवश्यक विकास निर्माणया ज्याया विषयस सहलह यायेगु यानाच्वंगु दु । थम्हं न्हापांनिसें म्हस्यूम्ह व सामाजिक क्षेत्रय् निरन्तर सक्रिया जुयाच्वंम्ह थःगु क्षेत्रया उम्मेदवार थःगु हे छेँय् वयाः थःपिनिगु समस्या, आवश्यकताया बारे खँ ल्हाःवःबलय् सकसिके उत्साह खनेदुगु खः ।
संगीत ख्यलय् म्हसियाच्वंगु नां खःसां राजनैतीक ख्यलय् नं न्हापानिसें हे सक्रियम्ह खः डा. अजयक्रान्ति शाक्य । नेकपा एमालेया नायः केपी शर्मा ओली नेतृत्वया सरकारय् ओलीया विज्ञान, प्रविधि, सामाजिक, साँस्कृतिक अले विकास सल्लाहकारया रुपं नं वयकलं ज्या यानादीगु खः । स्थानीय निर्वाचनया इलय् विद्यासुन्दर शाक्ययात त्याकेगु नितिं नं वयकलं सक्रिय भूमिका म्हितूगु दुगु खः ।
‘जिगु नितिं राजनीति धयागु समाजसेवा खः, जि जनताया सेवा यायेत थःगु उम्मेदवारी बियागु खः । जिं गुलि नं याये, ज्या हे याये, म्हगसय् म्हंके थें खँ आपाः ल्हाये जि मसः ।’ डा. शाक्यया धापू दु । ‘जनप्रतिनिधिया रुपं जिं दक्कले न्हापां उम्मेदवारी बियागु दु । जिं थनया जनतायात माःगु, सडक, लः आदि कथंया आधारभूत आवश्यकतानिसें फक्व सुविधाया नितिं ज्या यायेगु जुइ ।’ शाक्यं थःगु योजना न्यंकादिल ।
थन दुगु लःया समस्या, धःया समस्याया नितिं थः न्हापा नं सक्रिय जुयाच्वनागु शाक्यया धापू दु । क्षेत्र नम्बर ९ या जनतां डा. अजयक्रान्ति शाक्ययात थः प्रतिनिधि कथं ल्यइ ला मल्यइला व स्वयेत ला चुनाव क्वचायेकाः उकिया लिच्वःयात हे पी मानि । लिच्वः थःगु पक्षय् वःसां मवःसां थः धाःसा फु कथं थनया जनताया सेवाय् जाना हे च्वनेगु वयकःया धापू दु । तर क्षेत्र नंम्बर ९ या जनतां थःत हे निर्वाचित यानाबिल धाःसा थःगु विकासया अभियान न्ह्याकायंकेत लँ चालीगु व थः चान्हि थुकी हे ज्या यायेगु वयकलं धयादिल ।
बाम गठवन्धनं क्षेत्र नम्बर ९ स प्रदेश सभा क पाखें डा. अजयक्रान्ति शाक्यं उम्मेदवारी बियादीगु दुसा प्रदेश सभा ख पाखें केशव पोखरेलं उम्मेदवारी बियादीगु दु । अथे हे प्रतिनिधि सभापाखे कृष्णगोपाल श्रेष्ठं उम्मेदवारी बियादीगु दु ।
