चेन्नई सुपर किंग्सं रोयल च्यालेन्जर्स बैंगलोरयात बुकाबिल
ञलागा चर्तुर्थी ११४१, असोज ९ शनिबाः
ईन्डियन प्रिमियर लिग क्रिकेट (आईपीएल) टी–ट्वान्टी क्रिकेटय् थौं निगू कासा जुइत्यंगु दु ।
थौंया न्हापांगु कासाय् दिल्ली क्यापिटल्स व राजस्थान रोयल्सं धेंधें बल्लाः याइ । अथे हे, थौं हे जुइगु निगूगु कासाय् सनराइजर्स हैदरावाद व पन्जाव किंग्स म्हितेत्यंगु दु । थ्वयां न्ह्यः म्हिगः जूगु कासाय् चेन्नई सुपर किङ्सं रोयल च्यालेन्जर्स बैंगलोरयात बुकाब्यूगु दु । शारजाहलय् जूगु कासाय् चेन्नईं बैंगलोरयात ६ विकेटं बुकूगु खः ।
बैंगलोरं ब्यूगु सच्छि व ५७ रनया आज्जु चेन्नईं १८ ओभर १ बलय् ४ विकेट तंकाः पूवंकल । चेन्नईयात त्याकेत रुतुराज गायकवाडं दक्कले अप्वः ३८ रन दयेकूबलय् अम्बाती रायाडुं ३२ रन मुंकल । फाप डु प्लेसिसं ३१ रन दयेकूबलय् मोइन अलीं २३ रन दयेकल ।
सुरेश रैना १७ रनय् अविजित जूबलय् कप्तान महेन्द्र सिंह धोनी ११ रनय् अविजित जुल । बैंगलोरया हर्सल पटेलं २ विकेट काल । युजभेन्द्र चहल व ग्लेन म्याक्सवेलं १÷१ विकेट काल ।
थ्वयां न्ह्यः न्हापां ब्याटिङ याःगु बैंगलोरं २० ओभरय् ६ विकेट तंकाः सच्छि व ५६ रन दयेकूगु खः । बैंगलोरया लागि देवदत्त पडिकलं ७७ रनया अर्धशतकीय इनिङ्स म्हितल ।
अथे हे, कप्तान विराट कोहलीं ५३ रनया अर्धशतकीय इनिङ्स म्हितल । एबी डी भिलियर्सं १२ रन दयेकूबलय् ग्लेन म्याक्सवेलं ११ रन दयेकल । चेन्नईया ड्वाने ब्राभों ३ विकेट काल ।
शार्दुल ठाकुरं २ अले दिपक चाहरं १ विकेट काल । थ्व कासा त्याःगुलिसें चेन्नईं ९ कासां १४ ल्याः मुंकाः शिर्ष थासय् थहांवंगु दु । बैंगलोर ९ कासां १० ल्याः मुंकाः स्वंगूगु थासय् दु ।
Categorized in कासा
