च्याम्पियन्स लिग फुटबलय् म्यान्चेस्टर युनाइटेड व बायर्न म्युनिख त्यात
ञलागा नवमी ११४१, असोज १४ विहीबाः
युएफा च्याम्पियन्स लिग फुटबल धेंधेंबल्लाय् वंगु चान्हय् इंग्लीश क्लब म्यान्चेस्टर युनाइटेड त्याबलय् चेल्सी बूगु दु ।
थःगु हे मैदानय् जूगु पुचः ‘एफ’ या कासाय् म्यान्चेस्टर युनाइटेडं स्पेनको भियारियालयात २गू–१गूया गोल अन्तरं बुकल । म्यान्चेस्टर त्यागुलिइ क्रिश्चियानो रोनाल्डों इन्जुरी इलय् निर्णायक गोल याःगु खः । उगु हे पुचःया मेगु कासाय् इटालीया एटलान्टां स्विट्जरल्याण्डया योङ ब्वाइजयात १गू–०या गोल अन्तरं बुकल ।
उखे पुचः ‘एच’ या कासाय् इटालीया युभेन्टसं इंग्ल्याण्डया चेल्सीयात १गू–० या गोल अन्तरं बुकुबलय् रुसया जेनिथं स्विडेनया माल्मोयात ४गू–०या गोल अन्तरं बुकुगु खः । पुचः ‘ई’ या कासाय् जर्मनीया बायर्न म्युनिखं युक्रेनया डाइनामो किभयात ५गू–०या गोल अन्तरं बुकुबलय् स्पेनया बार्सिलोनायात पोर्चुगलया बेनिफिकां ३गू–०या गोल अन्तरं बुकुगु खः ।
अथेहे पुचः ‘जि’ या कासाय् अष्ट्रियाया साल्जवर्गं फ्रान्सया लिलयात २गू–१गूया गोल अन्तरं बुुकुबलय् जर्मनीया उल्फवर्ग व स्पेनया सेभियां १गू–१गू गोलया ज्वलिन्ज्वः म्हितुगु दु ।
Categorized in कासा
