च्याम्हम्ह संघनायक भिक्षु बोधिसेन महास्थविर
लहनान्युज | गुंलाथ्व १५ ११४०,साउन १९ सोमवाः
नेपाःया च्याम्हम्ह संघनायकया रूपय् भिक्षु बोधिसेन महास्थविर पदासीन जुयाबिज्याःगु दु । संघनायक भिक्षु ज्ञानपूर्णिक महास्थविर मदुगुलिं संघउपनायक भिक्षु बोधिसेन महास्थविर संघनायक जुयाबिज्याःगु दु ।
अखिल नेपाल भिक्षु महासंघया उपाध्यक्षपिं भिक्षु सुमेध महास्थविर नाप भिक्षु धर्ममूर्ति महास्थविरया उपस्थितिइ भिक्षु महासंघया धर्मानुशासक, पदाधिकारी व सम्बद्ध संघ दुजःपिनि दथुइ थौं च्वंगु मुँज्यां वसपोलपिंत संघनायक व उपसंघनायकय् पदासीन यायेगु थुगु निर्णय याःगु खः । मुँज्या स्वयम्भूस्थित ऐतिहासिक आनन्दकुटी विहारय् च्वंगु खः ।
मुँज्यापाखें महासंघया धर्मानुशासक, पुलांम्ह नायः, बोधिचर्या विहार (बनेपा) या संस्थापक प्रमुख महासद्धम्मजोतिकधज भिक्षु बोधिसेन महास्थविरलाई संघनायक पतिट्ठापनविधिसहित संघसम्मति विधिपूर्वक नेपाःया च्याम्हम्ह संघनायक पदय् धर्मगौरवसहित पदस्थापन याःगु खः ।
उकथं हे महासंघया धर्मानुशासक, पूर्वाराम विहार (धौख्यः) या संस्थापक प्रमुख महासद्धम्मजोतिकधज भिक्षु गुणघोष महास्थविरयात संघउपनायक पतिट्ठापनविधिसहित संघसम्मति विधिपूर्वक संघउपनायक पदय् धर्मगौरवसहित पदस्थापन याःगु खः ।
कोरोना संक्रमणया कारणं अप्वः हुलमुल याये मजिउगु कारणं उपयुक्त इलय् सार्वजनिक समारोह यासें संघनायक अभिनन्दन ज्याझ्वः जुइगु जानकारी भिक्षु महासंघया महासचिव भिक्षु कोण्डन्यं बियाबिज्याःगु दु ।
