छंगु ल्यूल्यू म्ये व टिकटक कासाया सिरपा घोषणा
सुरज, लहनान्यूज | पोहेलाथ्व एकादशी ११४५, पुस २६ बिहीवाः
अमर चित्रकारं च्वयादीगु व च्वमि चित्रकारनाप सरीता महर्जनया सः, भूपेन्द्र बज्राचार्यया संगीतय् लोकंह्वाःगु म्ये “छंगु ल्यूल्यू” म्ये कासा चन्द्रकृष्ण प्रजापतिं त्याकादीगु दु । थुगु कासाय् दकले बांलाम्ह म्येहालामिकथं न्हाप जुयाः वय्कलं छपु म्ये रेकर्डिङ व म्युजिक भिडियो सिरपा त्याकादीगु दु । “छंगु ल्यूल्यू” टिकटक कासा श्रृतिका श्रेष्ठ त्याकादीगु दुसा वय्कलं हे दकले अप्वः भ्यूजया सिरपा नं त्याकादीगु खः । वय्कलं न्हाप सिरपा नगद १५ द्वः तकाः व दकले अप्वः भ्यूज सिरपा नगद ५ द्व तका त्याकादीगु खः ।
यल महानगरपालिका १६ वडाया नायः निर्मलरत्न शाक्यं सिरपा त्याकादीपिन्त दसिपौ लःल्हानादीगु खःसा खादा व स्वांमाः सभानायः सरीता महर्जन व विशेष पाहां विजयरत्न असंबरे क्वखायेकादीगु खः ।
म्ये कासाय् म्ये छपु रेकर्डिङया सिरपालिसें ल्यू राजेशराज बज्राचार्य लाःगु खःसा म्ये छपु रेकर्डिङया सिरपालिसें लियांल्यू सिरपा सविनरत्न शाक्यं त्याकादीगु खः । टिकटक कासापाखे श्रीजा अवालें ल्यू सिरपा १० द्वः तका त्याकादीगु खःसा निकी बज्राचार्य देसारं ५ द्वः तकाः नगदलिसें लियांल्यू सिरपा त्याकादीगु खः ।
झिंन्यासः तका नगदनापं हःपा सिरपा त्याकादीपिं बबिता रञ्जित, रेश्मा महर्जन, कृष्मा चित्रकार, सुयन चित्रकार, विजय डंगोल, ममता श्रेष्ठ व समीर शंखदेव प्रजापति खः ।
ज्याझ्वलय् थुगु कासाया निर्णायकपिं निल शाक्य, भूपेन्द्र बज्राचार्य, सुरजवीर बज्राचार्य अमोघवीर बज्राचार्ययात नं हंगु खः ।
ज्याझ्वःया निगूगु ब्वय् सरीता महर्जनया सः, आनन्दरत्न बज्राचार्यया च्वसा व अनिल तुलाधरया संगीतय् ‘हायेकेमते’ म्ये प्रेमियर नं जूगु खः । मनोज महर्जन, हसना महर्जन, रुपा मानन्धर व सुब्रिना चित्रकारया अभिनय दुगु थुगु म्यूजिक भिडियोय् रुपमा मानन्धरं समा यानादीगु खः । छायाँकन व सम्पादन अमर चित्रकारं यानादीगु थुगु म्यूजिक भिडियोया कोरियोग्राफर सुमन बज्राचार्यं खःसा निर्देशन राजेन्द्र महर्जनं यानादीगु खः ।
टाइम आउट रेष्टुरेन्टय् जूगु थुगु ज्याझ्वः सुरजवीर बज्राचार्यं न्ह्याकादीगु खः ।
हायेकेमते म्ये न्यनादिसँ ।
https://youtu.be/wFrd9fEJH1Q?si=ysmYXhnhaZKIIB4W
