२०८० चैत्र १६, शुक्रबार

छधा प्याखं कासाय् ब्वतिमिपिन्त सुभाय् देछाल

लहनान्युज | दिल्लागा सप्तमी ११४०,असार २८ आइतवाः

नेपालय् हे न्हापांगु खुसी टेलिभिजनय् प्रत्यक्ष प्रसारणमार्फत नेपालभाषा एकेदेमिया ग्वसालय् जूगु छधाः प्याखं ब्वज्याया शन्चरबाः समापन जूगु दु । एकेदमिया ग्वसालय् व बागमति प्रदेश सामाजिक विकास मन्त्रालयया ग्वाहालिइ जूगु छधा प्याखं ब्वज्याया ब्वतिमि लिसें ग्वाहालिमि सलकसित सुभाय् देछासें समापन याःगु खः । किपुलिइ एकेडेमीया सभा भवनय् समापन ज्याझ्वः याःगु खः ।
 
प्याखं ब्वज्याया ब्वतिमि प्याखंया कलाकार, लेखक, निर्देशक व ग्वाहालिमिपिन्त शन्चरबाः ग्वसाखलःया पाखें सुभाय् देछागु खः । सुभाय् देछायेगु झ्वलय् सुभाय् पौ व मतिनाया चिं लःल्हागु खः । नेपालभाषा एकेदेमिका प्राज्ञ लिसें प्याखं ब्वज्या समितीया कजि बीरप्रसाद भन्सारीया सभानायसुइ जूगु सुभाय् देछा ज्याझ्वलय् विशेष अतिथि एकेडेमीया प्राज्ञ प्रा. डा. चन्द्रमान वज्राचार्य व वरिष्ठ चलचित्र पत्रकार लिसें नेपालभाषा एकेडेमीया प्राज्ञ विजयरत्न असंबरें प्याखं ब्वज्याया समीक्षा यानादीगु खः । प्याखं ब्वज्या पुचःया दुजः वरिष्ठ चलचित्र निर्देशक पवन जोशीं सुभाय् न्वचु तयादीगु खः ।
 
वंगु असार १६ गते दिल्लाथ्व दशमीकुन्हु किपूया रारा हिल स्कुलस्थित किर्तिपुर नाटक घरय् जूगु छधाः प्याखं ब्वज्याय् ८गू नाटकया ब्वति दुगु खः । कोरोना महामारीया संक्रमणया जोखिमयात बिचाः यानाः बिना दर्शक नेपाः च्यानल टेलिभिजनय् प्रत्यक्ष प्रसारण मार्फत छधा प्याखं ब्वज्या जूगु खः ।
 
ब्वज्याय् नाटककार पवन जोशीया निर्देशनय् मीना बज्राचार्यया लिथु, राजेश शाक्यया निर्देशनय् रामकृष्ण धिनाया थ्वपू कर्म, आर्यम नकःमिया निर्देशनय् शशीकला मानन्धरया चन्द्रहार, रवि महर्जनया निर्देशनय् राजेन्द्रकुमार पुताया थौंकन्हय् न्ह्यब्वःगु खः । अथे हे ब्वज्याय् न्ह्यब्वःगु मेमेगु नाटकय् रामकृष्ण खड्गीं निर्देशन यानादीगु लोककवि राजभाइ जकःमिया कीर्तिलक्ष्मी, लेखक व निर्देशक सुरेन्द्र तुलाधरया डा कान्छाभाई , लेखक व निर्देशक कृष्ण प्रजापतिया बुंख्याचा अले लेखक व निर्देशक राजु श्रेष्ठया तरकारी बन्जाः नंदुगु खः ।
 
Categorized in राष्ट्रिय