छम्ह आसा याय्बहःम्ह नकिं आराध्यलक्ष्मी
– विजयरत्न असंबरे
आराध्यलक्ष्मी खड्गी नेवाः कलाकारिताख्यःया छफ्वः ह्वया वयाच्वंगु स्वां खः । न्यादँ खुदँति न्ह्यःनिसें निरन्तर न्ह्यज्याना वयाच्वंम्ह आराध्यलक्ष्मी नेवाःख्यःया आपालंआपाः सांगीतिक ज्याझ्वलय् खनेदइम्ह कलाकार खः । आराध्यलक्ष्मी हुलाप्याखंख्यलय् साःप हे नुगः क्वसाःम्ह कलाकार खः । मचाबलय् निसें हे प्याखं हुलेगु धाल कि नुगःस्वां ह्वय्कीम्ह आराध्यं थः नर्सरी ब्वनाच्वंबलय् हे दबुलिइ प्याखं हुलाक्यंगु जुयाच्वनसा अनंनिसें दिपा मकासे निरन्तर थ्व हे ख्यलय् थःत पाना वयाच्वंगु दु ।
थथे मचाबलय् निसें हे हुलाप्याखंपाखे थःगु पलाः न्ह्याकूम्ह आराध्यलक्ष्मी थौं थ्व हे हुलाप्याखंयात थःगु लजगाःकथं नाला वयाच्वंगु दु । आराध्यं विशेष यानाः विद्या विकास बोर्डिङ्ग स्कूल व बर्न बी स्कूलय् मस्तय्त हुलाप्याखं स्यनिगु ज्या याना वयाच्वंगु दु । थौंकन्हय् धाःसा कोरोना संक्रमणपाखें सुरक्षित जुयाच्वनेगु नितिं लागू यानातःगु लकडाउनया हुनिं स्कूल बन्द जुयाच्वंगुलिं आराध्यया पलाः नृत्य सम्बन्धि स्व–अध्ययनय् न्ह्यानाच्वंगु दु ।
थुकथं थःगु जीवन हे हुलाप्याखंख्यःया नितिं फ्याना वयाच्वंम्ह आराध्य छम्ह हुलाप्याखं कलाकार ला जु हे जुल । वया नापनापं अभिनयपाखे नं नुगः क्वसाःम्ह कलाकार खः । ‘द मिथ जिरो’, ‘रिकरिंग ड्रिम्स’, ‘नशा’, ‘ईन्द्रायणी’ व ‘सरस्वती’ नांयागु
शर्ट फिल्मया नापनापं ‘लिबाय् धुंकाः’ नांयागु फिचर फिल्मय् हिरोइनया रुपय् अभिनय याय्धुंकूगु दु ।
नेवाः संकिपाख्यःया छम्ह नांजाःम्ह निर्देशक राजेशमान सिंहया निर्देशनय् दय्कूगु ‘लिबाय् धुंकाः’ संकिपाया क्लाइमेक्स सिनया शुटिंगया इलय् तरबारया च्वकां प्वाथय् त्यूबलय् थें ग्याःगु गबलें मदु धकाः कनादीम्ह आराध्यं अबाय्ति थःगु ज्यान हे वन धइथें च्वंगु खँ नं कनादी । आराध्यया न्हापांगु संकिपा ‘लिबाय् धुंकाः’ खःसां वयात हिरोइनकथं साइन याःगु न्हापांगु संकिपा धाःसा ‘दां मदु बाउचिया लैं न्याय्माः’ खः । तर थ्व संकिपाया ज्या धाःसा शुभ मुहुर्त स्वयां अप्वः न्ह्याय् मफुत ।
अभिनयपाखे नं पलाः न्ह्याःम्ह आराध्यया ‘द मिथ जिरो’ नांयागु शर्ट फिल्मंं नेपालभाषा चिसंकिपा कासाय् ल्यू सिरपाः त्याकेत ताःलाःगु खःसा ‘ईन्द्रायणी’ संकिपां नेपालभाषा टाईम्स चिसंकिपा धेंधेंबल्लाय् लियांल्यू सिरपाः त्याकल । वयागु न्हूगु शर्ट फिल्म ‘सरस्वती’ छगू जनचेतनामूलक संकिपा खःसा युट्युबय् रिलिज जूगु थ्व संकिपायात आपासिनं यय्कूगु दु । थःगु संकिपा वा थःगु छुं नं कथंया प्रस्तुतियात मनूतसें यय्किबलय् थःगु नुगः लसतां जाइगु धकाः धयादीम्ह आराध्ययात छगू स्टेज प्रोग्राम क्वचाय्काः स्टेजं कुहाँ वयाबलय् छम्ह ज्याथिम्ह मिसा वयागु प्रस्तुतियात कयाः च्वछाःगु व थःत वयागु छेँय् ब्वनायंकेत स्वःंगु खं थः तसकं प्रभावित जूगु जुयाच्वन । थ्व ख्यलय् ज्या यानाः गुलि दां कमय् याय्फइ वा दां मुनेफइ धइगु स्वयां नं मनूतय्त माया मतिना कमय् याय्फूगु हे थःगु नितिं तःधंगु खँथें च्वं आराध्ययात ।
हुलाप्याखंकःमिया रुपय् थःगु बिस्कं म्हसीका दय्केधुंकूम्ह आराध्यलक्ष्मीं नेपालभाषाया नापनापं खस नेपाली भाय्या म्यूजिक भिडियोख्यलय् नं उत्तिग्यंक हे पलाः न्ह्याका वयाच्वंगु दु । खय्त ला म्यूजिक भिडियो वयागु न्हापांगु पलाः हे खस नेपाली भाषाया म्येपाखें जूगु खः । नेपाःया नांजाःम्ह म्ये हालामि अन्जु पन्तया तसकं लोकंह्वाःगु म्ये ‘तिमी नभएर हो कि संगै दिल’ बोलया म्येय् मोडल जुया म्हितूम्ह आराध्यं लिपा नेपाःया हास्यख्यलय् तसकं नांजाःम्ह कलाकार हरिवंश आचार्यया ‘म त फसें माकुरी जालैमा’ म्येया म्यूजिक भिडियोय् नं मोडल जुया म्हितूगु खः ।
आराध्यलक्ष्मी नेपालभाषाया म्यूजिक भिडियो ख्यलय् ला तसकं हे सकृयम्ह कलाकःमि खः । छम्ह मोडलया रुपय्जक मखुसे हुलाप्याखंमि अले हुलाप्याखं स्यनामि अथे हे, छम्ह निर्देशकया रुपय् नं वयागु पलाः न्ह्याः । म्यूजिक भिडियोख्यलय् छम्ह कोरियाग्राफरया रुपय् तसकं नांजाःम्ह आराध्यलक्ष्मीं छुंछुं म्यूजिक भिडियोया निर्देशन नं याःगु दुसा थःत थथे म्यूजिक भिडियो निर्देशन याय्त हःपाः ब्यूगुलिं निर्देशक राजेशमान सिंहयात गुरुकथं हे नालीम्ह आराध्ययात हिरोइनया रुपय् ‘लिबाय् धुंकाः’ संकिपाय् अभिनय याय्गु ह्वःताः ब्यूम्ह नं निर्देशक राजेशमान सिंह हे खः ।
आराध्यलक्ष्मीयात छम्ह हुलाप्याखंमिया नापनापं कोरियोग्राफर याःम्ह छम्ह राजेशमान सिंह खःसा मेम्ह संगीतकःमि डबल शाक्य नं खः । नेवाः म्यूजिक भिडियोय् कलाकारकथं, कोरियोग्राफरकथं वा छम्ह निर्देशककथं थःगु कला न्ह्यब्वय्धुंकूम्ह आराध्यलक्ष्मीं नेपालभाषा स्टार म्युजिक भिडियो अवार्डय् बेष्ट मोडल पपुलर अवार्ड त्याकलसा गुलिखे अवार्डय् सिरपाया धेंधें बल्लाखय् नोमिनेशनय् वयागु नां पिहाँ वयाच्वं । आराध्यया ‘पियाच्वना’, ‘ए भ्वासिम्ह भाजु’, ‘नकतिनि ह्वःगु छफ्वः स्वां’, ‘तुयूगु ख्वालय् ह्याउँगु सिन्हः’, ‘होलि मेला’, ‘यल छ छम्ह’, ‘लसकुस यानाच्वना’, ‘जि थौं म्हनाच्वंगु’या नापनापं न्यय्गुलिं मल्याक म्युजिक भिडियोस थःगु कलाकारिता न्ह्यब्वय् धुंकलसा ‘लिटल च्याम्प्स्’लिसें आपालं कन्टेस्टय् कोरियोग्राफर जुयाः नं ज्या याय्धुंकल ।
आराध्यलक्ष्मीया बिचारय् मह जोडी अर्थात मदनकृष्ण श्रेष्ठ व हरिवंश आचार्यया जोडीयात अभिनयया ज्वःमदुगु दसु खःसा खस नेपाली संकिपाया लोकंह्वाःम्ह हिरो धिरेन शाक्यलिसे म्यूजिक भिडियोस ज्या यानाबलय् तसकं न्ह्याइपुसेच्वंगु नं आराध्यलक्ष्मीं कनादिल । थुकथं नेपालभाषा व खस नेपाली भाषाया कलाकारिता ख्यलय् थःत पाना वयाच्वंम्ह आराध्यलक्ष्मी खड्गीया आज्जु धइगु छम्ह बांलाःम्ह कोरियोग्राफर जुइगु खः, अथे हे छम्ह अभिनयकःमिया रुपय् नं सकसियागु नुगः त्याकेगु खः धइगु खनेदु ।
सदां थ्व ख्यलय् सकृय जुयाच्वने दय्मा धाइम्ह आराध्यलक्ष्मी खड्गीया याकनं हे पिलूवय्त्यंगु खस नेपाली भाय्या शर्ट फिल्म ‘वन वे’ खः । थ्व शर्ट फिल्मय् सुरज नापित र जुनु त्वायनाया नं मू भूमिका दुसा थुकी थःम्हं तसकं मिहेनत यानागु धयादिसें थ्व छगू बांलाःगु संकिपा जुयाः पिदनिगु आसा यानाच्वंम्ह आराध्यलक्ष्मीयात नेवाः संकिपाख्यलय् अभाव जुयाच्वंगु हिरोइनया समस्यायात ज्यंकीम्ह हिरोइनया रुपय् कयातःगु दु ।
