२०७८ कार्तिक १०, बुधबार

जङ्गबहादुरया कलम

न्हुछेभक्त कवां
 
महाराज जंगबहादुर बेलायतय् सवारी जूबलय् महारानी एलिजाबेथं “टाउन अफ लभ” धकाः तसकं बांलाःगु कलम छपु उपहार बियाहल । वं उकियात खुब सम्मान यानाः न्ह्याबलें थःगु कोटया देपापाखें तयाः जुल । छन्हु आकाझाकां व कलम दरबारय् दुने हे तन । उकियात कयाः दरबारय् हल्लाखल्ला जुल । दरबारया फुक्क मनूत कलम मालेगुली ब्यस्तव्यस्त जुल । अय्नं सुना नं लुइके मफु ।
 
थ्व खँ धीरशम्शेरं नं सिल । व दरबारय् उपस्थित जुयाः महाराजयात आश्वासन ब्युब्युं धाल, “महाराज ! छिगु शासनय् छिगु हे कलम वनं दरबारय् दुने तनी हे मखु । उकियात जिं न्ह्याग्गु उपाय यानाः जूसां लुइका बी ।” 
 
थःत अति यःगु कलम तंगुलिं औंसीया स्वर्गथें ख्यूँसे च्वंनाच्वंगु जंगबहादुरया ख्वाः धीर शम्शेरया आश्वासन न्यनाः छक्वलं तुं हे पुन्हीया तिमिलाथें थित । 
धीर शम्शेरं मातहतया कर्मचारीतय्त आदेश बिल, “महाराजया कलम न्ह्याग्गु उपाय यानाः जूसां लुइकेमाल ।”
 
थ्व आदेशं कर्मचारी त फुक्कं गरुडं खंम्ह नागथें ग्वाराग्वारा चिन । आः छु जुइ, अबले छु जुइ उमिसं छु हे अनुमान याय् मफुत । सकसिनं थःगु गर्धनय् महाद्यःया ककुइ च्वंम्ह गोमन सर्प हिउँवःगु ताय्कल । 
 
उमिसं तुरुन्त हे येँय्, यलय् व ख्वपया वडा हाकिमतय्त न्ह्याग्गु यानाः जूसां कलम खुँ पत्ता लगेयानाः ज्वना हिँ । मखुसा .... धकाः कडा निर्देशक बिल । 
बडा हाकिमतय्सं तुरुन्त हे थःथःगु इलाकाया पुलांपिं व पटके खुँत व न्हूपिं शंका वंपिं खुँतय्त ज्वनाः कडा नकसां केरकार याकेबिल । थ्वहे सिलसिलाय् कमजोर व बुरापिं स्वम्ह प्यम्ह खुँत सित । 
 
साती कुन्हु सुथय् त्यलं धीर शम्शेर दरवारय् हाजिर जुयाः जंगबहादुरयात धाल, “महाराज ! स्वंगु शहरय् नं खुं मालेगु ज्या बडो जोडतोडं जुयाच्वंगु दु । नाखँ दुने सुचुकाः च्वंसा खुँतय्सं कलम पचे याय् फइमखु । शायद बहनी तकया दुने पता लगे .... ।
 
धीर शमशेरया खँ क्वमचाबलय् हे जंगबहादुर बहनी हे लुल । छु जूगु जुल धाःसा, “न्ह्याबलें जिं देपा पाखेंया म्हिचाय् तय्गु व कलम गय् गय् म्हिगः जःपापाखेया म्हिचाय् लानाच्वन । उखेपाखे स्वय्गु मती हे मवनाच्वन ।” थुलि धया जंगबहादुर तसकं न्हिल । जंगबहादुरनापं धीर शम्शेर नं न्हिल । हा हा हा हा .......।