२०७८ मङ्सिर २२, बुधबार

जनताया नुगः त्याकेगु तःधंगु ह्वःताः खः शेरबहादुर देउवाया नितिं

काजी रत्न | दिल्लागा सप्तमी ११४१,साउन १६ सनिवाः

ताः ईया विवाद, राजनीतिक खिचातानी लिपा अन्ततः केपी शर्मा ओली नेतृत्वया सरकार क्वदलाः शेरबहादुर देउवा नेतृत्वया सरकार वःगु दु । विपक्षी गठबन्धनया नेतृत्व यानाः सरकारया नेतृत्वय् थ्यंम्ह काँग्रेस सभापति शेर बहादुर देउवाया न्ह्यःने तःधंगु हे हाथ्यालिसें अवसर नं वःगु दु । दक्कले तःधंगु हाथ्या ला वय्कः प्रधानमन्त्री जुयाकथं खनेदत । राष्ट्रपति ज्याकुथिं ब्यूगु नियुक्ती पत्रय् हे संविधानया धारा उल्लेख मयाःसे सर्वोच्च अदालतया परमादेशं प्रधानमन्त्री नियुक्त जूगु धकाः च्वय्गु, महान्यायाधिवक्ताया सपथय् थः उपस्थित मजुइगु धकाः राष्ट्रपतिं धाय्गु । राष्ट्रपतिया थज्याःगु गतिविधिं राष्ट्रपतिया दलीय व्यवहार व पूर्वाग्रहलिसें दम्भया तकं प्रदर्शन जूगु कथं विश्लेषण जुयाच्वंगु दु ।
 
नेकपा एमालेया सरकार क्वथलाः प्रधानमन्त्री जूम्ह देउवाया नितिं नेकपा एमालेया हे राष्ट्रपति हाथ्या जुइगु विश्लेषण राजनीतिक विश्लेषकतय्सं यानाच्वंगु दु । उकिया नापं कोरोना महामारी, अव्यवस्थित खोप वितरण, अव्यवस्थित उपचार प्रणाली नं वर्तमान प्रधानमन्त्री शेरवहादुर देउवाया नितिं तःधंगु हाथ्या खःसा छगू ह्वःताः नं जुइफु ।
 
धात्थें धाय्गु खःसा केपी शर्मा ओली नेतृत्वया सरकारप्रति आम जनता निराश हे जूगु खः । विशेष यानाः कोरोना महामारी नियन्त्रणया सवालय् । विना योजनाया लकडाउनं आर्थिक समस्या फय्माःगु व दैनिक जीवन न्ह्याकेत तकं समस्या जुयावःपिं आम सर्वसाधारण ओली सरकारप्रति रुष्ट हे जूगु खः । उकिया नापं उपचारय् नं छुं बांलाःगु लिच्वः बीमफूगु, खोप वितरण व्यवस्थित जुइमफूगु, माक्व ल्याखय् खोप हय्मफूगुलिसेंया थीथी समस्या ला खनेदुगु हे खत । उकिया नापं ओलीया व्यवहार नं दम्भं जाःगु व ईतिहासय् हे तानाशाही प्रधानमन्त्री धकाः तकं ओलीया आलोचना जुल । 
 
थ्व सकतां खँ देउवाया नितिं अवसर सावित जुइफु । मित्र राष्ट्रतलिसे सन्तुलित राजनीति स्वापू दय्कुसें खोप हयाः व्यवस्थित रुपं वितरण यानाः सुरक्षित वातावरण निर्माण याय्फःसा ईतिहासं देउवायात सफल प्रधानमन्त्रीया रुपय् लुमंकी । उकिया नापं उपचारया नितिं नं स्वास्थ्यकर्मीपिन्त ज्या याय्गु लकस दय्काः उमित हःपाः बियाः, माःकथंया दक्वं व्यवस्थापन यानाः प्रभावकारी लिच्वः बीफत धाःसा कोरोना संक्रमणं दुःख सियाच्वंपिं संक्रमित व उमि परिवारं जिवंकाछि देउवायात सुवाः व सुभाय् बियाच्वनी । 
 
आः संक्रमण नियन्त्रण व रोकथामया लागिं धासें स्मार्ट लकडाउन ला तयातःगु दु । तर लकडाउन गन गुकथं तयातःगु धकाः माल धाःसा सुनां गनं लुइके फइमखु । दक्वं बन्द जक यानाच्वनेगु नं समाधानया उपाय मखुसा दक्वं यत्थे चाय्के बियां नं समस्या समाधान जुइगु स्वयां झन अप्वइ । अय्जूगुलिं धात्थें हे स्मार्ट लकडाउन यानाः संक्रमण अप्वः मन्यनीगु, भीडभाड मजुइगु कथंया निश्चित नियम, योजना दय्काः न्ह्याःवंसा थुकिं देउवाया बुद्धिमत्ताया तारिफ हे जुइ । आःया समस्या धइगु हे भारतया खुला सीमाना खः । भारतया खुला सीमानायात नियन्त्रणय् तय्फुसा ला झन देउवायात राष्ट्रवादी प्रधानमन्त्री कथं नेपालं सदां लुमंका तइ ।
 
झीसं सुझाव बीगु खः, ज्या यानाः क्यनेमाःम्ह देउवा हे खः । आः वय्कः गुकथं न्ह्याःवनी उकिं हे वय्कःया दक्षता प्रमाणित याइ । हानं दक्षताया न्ह्यसः ला देउवालिसे राजतन्त्रया इलय् ज्ञानेन्द्रया शासनकालनिसें स्वानावःगु खँ वय्कलं ल्वःमंकेमज्यू।