जनता समाजवादी पार्टीया अध्यक्षय् बाबुराम भट्टराई
पूर्वप्रधानमन्त्री बाबुराम भट्टराई जनता समाजवादी पार्टीया संघीय परिषद् अध्यक्षय् ल्यःगु दु। जसपाया थौं मंगलवाः केन्द्रीय कार्यकारिणीया बैठकं  भट्टराईयात संघीय परिषद् अध्यक्ष दयेकेगु निर्णय याःगु खः।
 
भट्टराईयात संघीय परिषद् अध्यक्ष दयेकेगु निर्णय यासे उगु बैठकं संघीय परिषद् नाप ८०१ म्ह सदस्यीय केन्द्रीय समिति तक गठन याःगु खः। अथेहे पार्टीया समायोजनया लागि समायोजन कार्यदल न गठन याःगु खः।
 
जसपाया अध्यक्षय् महन्थ ठाकुर व उपेन्द्र यादव न दुगु खः। राजेन्द्र महतोयात वरिष्ठ नेता दयकूगु दु सा भट्टराईया नामय् पार्टी एकताया लागि निर्वाचन आयोगय् छ्वःगु दु।
 
पार्टीया विधान परिमार्जन यासे विधानय् आधारित नियमावली तक उगु बैठकं पारित याःगु दु। जसपाया बैठकं कोभिड १९ रोकथाम तथा नियन्त्रणय् सरकारया पहल मगाःगु धका विरोध न याःगु दु।
 
कैलालीपाखे निर्वाचित सांसद रेशम चौधरीया रिहाइ व पार्टीय मेमेपि नेता कार्यकर्ता थीथी मुद्दाय् कुनातःपिनिगु रिहाइया माग यासे देय्यकं ज्याझ्वः यायेगु निर्णय राजपा याःगु दु।
Categorized in राजनीति