जनबहाःद्यःया रथयात्रा स्थगित
लहनान्युज | चिल्लाथ्व एकादशी ११४०
सेतो मछिन्द्रनाथ रथ यात्रा व्यवस्थापन समिति थौं शुक्रवाः सुथय् च्वंगु मुँज्यां जन बहाःद्यःया रथयात्रा स्थगित यायेगु निर्णय याःगु दु ।
रथयात्रा स्थगित जूगु खँ न्ह्यथनाः समितिं छगू प्रेस वक्तव्य नं पितब्यूगु दु ।
थौंकन्ह्य हलियकं महामारीया रुप कयाच्वंगु कोरोना भाइरस पूर्व नियन्त्रणया झ्वलय् थुगुसी जनबहाःद्यःया रथयात्रा स्थगित यायेमाःगु खँ व्यवस्थापन समिति थौं पितब्यूगु प्रेस वक्तव्यय् न्ह्यथनातःगु दु ।
जात्रा थ्व हे वइगु चैत १९ गतेनिसें न्ह्याइगु येँया दकलय् तःधंगु जात्रा जनबहाःद्यःया रथयात्रा स्थगित जूसां द्यःयात यायेमाःगु विधि धाःसा पूवंकीगु निर्णय नं मुँज्यां याःगु दु ।
गुथि संस्थानया नायः मीनराज चौधरी, गुठी संस्थान काठमाडौं जिल्लाया अध्यक्ष हरिप्रसाद सुवेदी लिसें सेतो मछिन्द्रनाथ रथयात्रा व्यवस्थापन समितिया दुजःपिं, थीथी संघसंस्थाया प्रतिनिधिपिनि उगु मुँज्याय् उपस्थिति दुगु खः ।
