जमैका विजयी सुरुवात
लहनान्युज | ञंलाथ्व १ ११४०,भाद्र ४ बिहीवाः
नेपाली क्रिकेटर सन्दीप लामिछाने सम्मलित जमैका तल्लावाहजय् क्यारेबियन प्रिमियर लिग (सीपीएल) टी–२० क्रिकेटय् विजयी सुरुवात याःगुु दु ।
जमैकाया सेन्ट लुसिया जुक्सयात न्याःगु विकेटं त्याकूगु दु ।
ट्रिनिडाड एण्ड टोबागोय् जारी जूग कासा जमैकाया १५९ रनया लक्ष्य ७ बल बाँकी दुगु इलय् ५ विकेट गुमे याना पूरा याःगु दु । कमजोर सुरुवात याःगुलि ओपनर ग्लेन फिलिप्स व मध्यक्रमया ब्याट्सम्यान आसिफ अलीं बालाक्क ब्याटिङ यासे जमैकायात त्याकेत तालाःगु खः । उगु कासाय् सन्दीपं किफायती बलिङ यासे १ विकेट काःगु खः ।
ओपनर चाडविल वाल्टन २ व निकोलस किर्टोन १ रन दयेका आउट जुया जमैका सुरु हे दबाबय् लाःगु खः । तर फिलिप्स व कप्तान रोभमन पावेलं तेस्रो विकेटया लागि ६३ रनया साझेदारी यासे इनिङ्सयात न्ह्यने यकूगु खः ।
फिलिप्सं २९ बलय् ३ चौका व ३ छक्काया ग्वाहालि ४४ रन दयेकूगु खः । पावेलं १७ बलय् २६ रन दयेकूगु खः । जमैकायात त्याकेगु लागिखः आसिफ अलीं २७ बलय् ५ चौका व २ छक्कां अविजित ४७ रन दयेकूगु खः ।
उगु कासाय् आन्द्रे रसेलं १६ रन, कार्लोस ब्रेथवेइटं ९ बलय् १ चौका १ छक्काया ग्वाहालि अविजित १८ रन दयेकूगु खः । सेन्ट लुसियाया केसरिक विलियम्सं निगु विकेट काःगु खः ।
ब्रयान लारा एकेडेमी मैदानय् टस बुया न्हापा ब्याटिङ यासे सेन्ट लुसियां रोस्टन चेसया अर्धशतकया ग्वाहालि निर्धारित २० ओभरय् ७ विकेट गुमे याना १५८ रन दयेकूग खः । चेसं ४२ बलय् ४ चौका, २ छक्काया ग्वाहालि ५३ रन दयेकूगु खः । अथेहे नजिबुलल्ह जद्रानं २५ रन, आन्द्रे फ्लेचरं २२ रन दयेकूगु खः । जद्रानयात सन्दीप लामिछानेें आउट याःगु खः ।
जमैकाया भिरास्वामी प्रमुल व मुजिव उर रहेमानं निगु निगु विकेट काःगु खः । सन्दीपं ४ ओभरय् २३ रन बिया १ विकेट काःगु खः । सेन्ट लुसियां न्याःगु विकेट जमैकाया स्पिनरं काःगु खः ।
