भारत सरकारं उत्तरी राज्य जम्मु कश्मिर कयाः वयाच्वंगु विशेष राज्यया मान्यतायात खारेज यायेगु ऐतिहासिक निर्णय याःगु दु ।

 

भारत शासित जम्मु कश्मिरय् राजनीतिक संकट तच्वया वनाच्वंगु इलय् न्हू दिल्लीया लोककल्याण मार्गय् च्वंगु प्रधानमन्त्री नरेन्द्र मोदीया निवासय् थौं सोमवाः च्वंगु मुँज्यां उकथंया निर्णय याःगु खः ।

 

मुँज्यां दफा ३७० खारेज यायेकथं भारतया संविधानय् संशोधन यायेगु प्रस्ताव पारित याःगु खः । मन्त्रीपरिषदया मुँज्या लिपा हे जम्मु कश्मिरया सुरक्षा व्यवस्थायात कयाः सहलह यायेत सुरक्षा समितिया मुँज्या तकं च्वंगु खः ।

 

उगु धारां जम्मु कश्मिरयात विशेष राज्यया मान्यता बियातःगु खः । थुकिया अतिरिक्त सरकारं जम्मु कश्मिरयात निगू अलग केन्द्र शासित राज्यय् विभाजन यायेगु निर्णय तकं याःगु दु । गुकिया कथं आः जम्मु कश्मिर नापं लद्दाख निगू केन्द्र शासित राज्य जुइ । 

 

मन्त्री परिषदया मुँज्या लिपा न्ह्याःगु राज्यसभाया मुँज्याय् गृहमन्त्री अमित शाहं विपक्षीतय्गु विरोधया दथुइ दफा ३७० खारेज यायेगु सम्बन्धय् संकल्प प्रस्ताव न्ह्यब्वयादीगु खः । यदि संसदया निगुलिं सदनय् उगु प्रस्ताव पारित जुल धाःसा भारतीय राष्ट्रपतिं ल्हाःचिं तयेवं जम्मु कश्मिरं कया वयाच्वंगु विशेष राज्यया अधिकार अन्त्य जुइ ।

 

उगु धाराय् रक्षा, विदेश मामिला, अर्थ व सञ्चार बाहेकया कानून लागू यायेमाःसा केन्द्र सरकारं राज्य सरकारया सहमति माःगु व्यवस्था दु । सरकारया निर्णययात कायः विपक्षीतसें तसकं विरोध याःगु दु ।

 

राज्यसभाय् विपक्षी दलया नेता गुलाम अवि आजादं दफा ३७० खारेज यायेगु सरकारया निर्णयपाखें भारतया संविधानया हत्या जूगु दावी यानादीगु दु । अथे हे, जम्मु कश्मिरया पुलांम्ह मुख्यमन्त्री महबुबा मुफ्तिं ट्वीट यानादिसें सरकारया निर्णय गैरकानूनी व लोकतन्त्रया हाकूगु दिं जूगु धयादीगु दु । नापं वय्कलं उगु निर्णयपाखें बांमलाःगु लिच्वः ब्वलनीगु तकं ख्याच्वः बियादिल ।

 

मन्त्रीपरिषदया मुँज्यां संविधानया धारा ३५ (क)या सम्बन्धय् धाःसा छुं नं निर्णय याःगु मदुनि । जब कि थौंया मन्त्रीपरिषदया मुँज्यां उगु धाराया संशोधन यायेगु सम्बन्धय् नं निर्णय याइगु अपेक्षा यानातःगु खः । उगु धारां जम्मु कश्मिरय् छेँ जग्गा न्यायेत व स्थायी बसोबास यायेत अनया नागरिकयात विशेष सुविधा ब्यूगु दु । भारतीय जनता पार्टी भाजपां थःगु चुनावी घोषणापतिइ हे उकियात संशोधन यायेगु न्ह्यथनातःगु खः ।

 

मोदी सरकारं निक्व खुसी निर्वाचित जुइवं उगु धारा संशोधन याइगु अनुमान याना वयाच्वंगु खः । तर, राज्यया राजनीतिक दलं धाःसा उगु धारा संशोधन याःसा थःपिन्त मान्य मजुइगु धया वयाच्वंगु खः ।