जर्मनीं पोर्चुगलयात ४–२गूया गोल अन्तरं बुकल
बछलाथ्व दशमी ११४१, असार ६ गते आइतबाः
युरोकप फुटबलय् वंगु चान्हय् जर्मनीं पोर्चुगलयात ४–२गू या गोल अन्तरं बुकुगु दु ।
जर्मनीया म्युनिखय् जूगु कासाय् पाहाँ टोली पोर्चुगलया क्रिश्चियानो रोनाल्डों न्हापांगु गोल याःगु खः । तर वयांलिपा जर्मनीं मदिक्क ४गू गोल याःगु खः । उमिगु नितिं काइ हाभर्ट्ज व रोबिन गुसेन्सं छगू छगू गोल याःबलय् पोर्चुगलया हे डिफेन्डरत रुबेन डियास व राफेल गुरेरों निगू आत्मघाति गोल याःगु खः । ६७गूगु मिनेटय् डिएगो योटां छगू गोल थप याःसा नं पोर्चुगलयात बुइगुपाखें ल्यंके मफुत ।
थ्व जित लिपा पुचःया निगूगु थासय् थाहाँवंगु जर्मनीं मेगु चरणय् थ्यनेगु संभावना जिवित तःबलय् पोर्चुगल ३गूगु थासय् कुहाँवंगु दु । जर्मनी व पोर्चुगल निगुलिं टिमया उतिग्यंक ३गू–३गू ल्याः दु । ४गू ल्याः मुंगु े फ्रान्स शिर्ष थासय् दु् ।
म्हिगः कासाय् फ्रान्सं हंगेरीलिसे १गू–१गू गोलया ज्वलिन्ज्वःलय् नुगः चिइमाःगु खः । युरोकप फुटबलया हे मेगु कासाय् स्पेन व पोल्याण्डं १गू–१गू गोलया ज्वलिन्ज्वः कासा म्हितूगु दु ।कासाय् स्पेनया नितिं अल्भारो मोराटां न्हापांगु गोल याःबलय् पोल्याण्डया रोबर्ट लेवान्डोस्कीं ज्वलिन्ज्वः गोल याःगु खः । युरोकप फुटबलय् थौंपाखें पुचःया लिपांगु चरणया कासात न्ह्यायेत्यंगु दु ।
थौं चान्हय् ९ ता ई जुया १०गू मिनेटय् पुचः ‘ए’ या निगू कासा जुइ । राउण्ड अफ सिक्सटिनय् थ्यनेधुंकुगु इटालीं वेल्सलिसे म्हितिइबलय् स्वीट्जरल्याण्ड व टर्की दथुइ धेंधेंबल्ला जुइ ।
Categorized in कासा
