जर्मन सुपर कप फुटबलया उपाधि बार्यन म्युनिखयात
गुंलाथ्व एकादशी ११४१, भाद्र २ गते बुधबाः
थुगुसिइया जर्मन सुपर कप फुटबल धेंधेंबल्लाया उपाधि बायर्न म्युनिखं त्याकुगु दु ।
जर्मनीइ वंगु चान्हय् जूगु कासाय् बोरुसिया डर्टमण्डयात ३गू–१गू या गोल अन्तरं बुका बायर्नं उपाधि त्याकुगु खः । बायर्नयात सिजनया न्हापांगु उपाधि चूलाका बिइत पोल्याण्डया कासामि रोबर्ट लेवान्डोस्कीं निगू गोल याःबलय् थोमस मुलरं छगू गोल थप याःगु खः ।
बोरुसिडा डर्टमण्डया मार्को रिउसं छगू हपाः गोल याःगु खः । जर्मन सुपर कपय् थ्वयान्ह्यःया सिजनया बुन्डेस लिगा व जर्मन कप फुटबलया त्याकामित दथुइ धेंधेंबल्ला जुइगु याःगु दु ।
थ्वयान्ह्यःया सिजन बायर्न म्युनिखं लिग त्याकुगु खःसा डर्टमण्डं जर्मन कप त्याकुगु खः । थुगु धेंधेंबल्लायात जर्मनीइ न्हूगु सिजनया फुटबलया सुरुवातया रुपय् कायेगु याः ।
न्हूगु सिजनया जर्मन बुन्डेस लिगा मेगु वालं न्ह्यायेत्यंगु दु । न्हापांगु कासाय् साविक त्याकामि बायर्न म्युनिखं एफ.सी कोल्नलिसे म्हितिबलय् डर्टमण्डया धेंधेंबल्ला एस.सी फ्राइबर्गलिसे जुइ ।
Categorized in कासा
