जलवायु हिउपा सम्बन्धी विश्व सम्मेलन (कोप–२६) थौं निसें स्कटल्याण्डया ग्लास्गोय् न्ह्यायेत्यंगु दु ।

सम्मेलन नोभेम्बर १२ तक्क न्ह्यायेत्यंगु खः । सम्मेलनय् हलिंया राष्ट्रप्रमुख, सरकार प्रमुख, सरकारी प्रतिनिधित, विषय विज्ञ, नागरिक समाज, व्यवसायिक क्षेत्र व सञ्चार माध्यमया प्रतिनिधित लिसें द्वलंद्वःम्ह मनूतय् ब्वति दुथ्यायेत्यंगु दु ।

कोप २६ अन्तर्गत हलिंया नेतातये शीर्ष सम्मेलन कन्हय् व कंसः जुइत्यंगु दु । सम्मेलनय् जलवायु सम्बन्धी थी थी समस्या व ज्यंकेगुया कुतःया खँय् सहलह जुइत्यंगु दु । हलिंया नेतातयेसं पृथ्वीयात भविष्यय् नं जीवनयोग्य दयेकेत गुकथंया पलाःत न्ह्याकेगु धइगु सकसिया चिउताया विषय जूगु दु  ।

कोपया लक्ष्य सफलतापूर्व चूलाकेत व जलवायु हिउपालिसे ल्वायेत शीर्ष नेतातयेसं स्यल्लागु योजना व विश्वसनीय योजनात दयेकेगु अपेक्षा याःगु दु । सन् २०१५ य् फ्रान्सया पेरिसय् जूगु सम्मेलनं क्वजिउगु लक्ष्यत थुगु सम्मेलनं छुं परिमार्जन याइगु ताकं याःगु दु ।

सम्मेलनय् नेपाःया पाखें प्रधानमन्त्री शेरबहादुर देउवा दुथ्यानादी ।

Categorized in अन्तर्राष्ट्रिय