जागरुक युवाया ग्वसालय् हिदान ज्याझ्वः जुल
कछलागा षष्ठी ११४१, मंसिर २१ आइतवाः
ब्लड डोनार्स एशोसियसन नेपाल (ब्लोदान) केन्द्र व येँ मध्य क्षेत्रया आह्वानय् श्वेत भैरव ल्याय्म्ह पुचः व जागरुक युवा समाजया ग्वसालय् न्यतय् हिदान ज्याझ्वः जुगु दु।
जागरुक युवा समाजया सचिव राजीव श्रेष्ठया संयोजकत्वय् जुगु उगु ज्याझ्वलय् येँ महानगरपालिका १८ वडा व नरदेवी बचत तथा ऋण सहकारी संस्थाया ग्वाहालिं उगु ज्याझ्वलय् ५१ म्हेसिनं हिदान यानादीगु खः । उगु ज्याझ्वलय् न्याम्हेसिया प्लाज्मा दान नं याःगु खः ।
ज्याझ्वलय् प्रदेश नं. ३ या सांसद वसन्त मानन्धर मू पाहाँ, १८ वडा अध्यक्ष न्हुछेकाजी महर्जन पाहां कथं झायादीगु खः ।
अथेहे ज्याझ्वलय् ब्लोडानया केन्द्रीय अध्यक्ष सानुबाबु प्रजापति, कोषाध्यक्ष मचाकाजी महर्जन, केन्द्रीय दुजः व २४ वडा सदस्य विनोद तुलाधरपिनि उपस्थिति दुगु खः ।
