जापानं काबुलस्थित दूतावास चिइकीगु
गुंलागा एकादशी ११४१, भाद्र १७ बिहीवाः
जापानं अफगानिस्तानया काबुलस्थित दूतावास चिइकीगु, फुक्कं ज्या दोहां याइगु, मेमेपिन्सं न राजनीतिक अस्थिरताया हुनिं नियोगत अस्थायी रुपय् चिइकाच्वन ।
जापान सरकारं अफगानिस्तानय् दुगु दूतावासया ज्या कतारं यायेगु निर्णय याःगु दु । जापानया विदेश मन्त्री तेशिमित्सु मोतेगीं अफगानिस्तानय् दुगु जापानीे दूतावासया ज्या आवलिं कतारया राजधानी दोहां न्ह्याकेगु तयारी जूगु पुष्टि यानादीगु दु ।
तालिवान विद्रोहीतय्सं अफगानिस्तानया सत्ता कब्जा यायेवं राजनीतिक अन्यौल ब्वलंगु जुयाः विदेशी कूटनीतिक नियोगतय्सं थःथःगु दूताबास अफगानिस्तानं चिइकाच्वंगु दु । अफगानिस्तानं यक्व हे देशं थः नागरिक लित यंकाच्वंगु ईलय् जापानं न दूतावासया ज्या मेगु हे देशं न्ह्याकेगु तयारी याःगु खः ।
आः न अफगानिस्तानस्थित दूतावासया ज्या अस्थायी रुपय् टर्कीया स्तानबुलस्थित कन्सुलेट जनरलपाखें यानाच्वंगु दु ।
Categorized in अन्तर्राष्ट्रिय
