२०७७ माघ ८, बिहिबार

जापानं सन् २०५०य् पेट्रोल कार बिक्री बन्द यायेगु योजना

रमित | कछलागा चौथी ११४१, मंसिर १९ शुक्रवाः

जापानं सन् २०५० तक कार्बन तटस्थताया थःगु लक्ष्य पूरा यायेगु उद्देश्यं वःगु १५ दँ लिपा पेट्रोल कारया बिक्री बन्द यायेगु योजना सार्वजनिक याःगु दु । 
 
जापानी सञ्चारमाध्यमया कथं मेगु वाः निसे जापानं न्हुगु नीति सार्वजनिक याःगु दु। जापानी अखबार माइनिची शिमबुन नं जापानया विद्युतीय व हाइब्रिड सवारी साधनया बिक्रीयात न्हापागु प्राथमिकताय् तःगु दु धका धाःगु दु ।
 
प्रधानमन्त्री योशिहिदे सुगा नं वःगु अक्टोबरय् जापानयात सन् २०५० दुने कार्बन तटस्थ देय् दय्केगु माःगु कुतः यायेगु घोषणा याःगु दु। प्रधानमन्त्री सुगां थःगु नीति सार्वजनिक यायेवं तधःगु कम्पनीं कार्बन उत्सर्जनयात नियन्त्रणय् हयेगु योजनाया मस्यौदा निर्माण यायेगु दबाब वःगु दु। 
 
जापानया थुगु पलाःयात वातावरण अभियन्ता व राष्ट्र सङ्घं लसकुस याःगु दु।
 
वःगु सेप्टेम्बरय् अमेरिकी राज्य क्यालिफोर्निया नं सन् २०३० तक थःगु राज्यय् मिइगु कार शून्य–उत्सर्जनयुक्त जुइगु घोषणा याःगु खः।
 
अथेहे बेलायत नं अझ महत्तवाकाक्षी योजना न्ह्यने हःगु दु। सन् २०३० तक बेलायतय् दक्को प्रकारया पेट्रोल व डिजलं सञ्चालन जुइगु कार प्रतिबन्ध यायेगु बेलायत सरकारं घोषणा याये धुकुगु दु।
Categorized in अन्तर्राष्ट्रिय