२०७८ मङ्सिर २२, बुधबार

जाली नोट लिसें छगु पुचःयात ज्वन

कछलाथ्व पुन्हि ११४२, मंसीर ३ शुक्रवाः

जाली नोट छापे यानाच्वंगु छगू पुचःयात प्रहरीं नियन्त्रणय् काःगु दु ।

ज्वंपिंलय् सिन्धुपाल्चोकया ५६दँया गोमा श्रेष्ठ, ४१ दँया  पुष्पा थापामगर, १९ दँया चिरञ्जीवी जोती, २३ दँया सुजन जोती व रामेछाप सिरुवारीया २६दँया समरोज थापामगर दु ।

प्रहरी वृत्त बौद्धया टोलीं बूढानीलकण्ठ नगरपालिका–११ कपनस्थित समरोज थापामगरया कोठाय् नक्कली ध्यबा छापे यायेत रङ्गीन प्रिन्ट यानाच्वंगु अवस्थाय् ५म्हसित ज्वंगु खः । उमिगु पाखें ६५द्वः ३सः व ३५तका बरामद जूगु दु ।

महानगरीय प्रहरी बृत बौद्धया प्रमुख ढुन्डीराज न्यौपानें गोकर्णेश्वर नगरपालिका–७ दक्षिणढोकाय् जाली ध्यबा ज्वना सामान यानाच्वंगु अवस्थाय् गोमा श्रेष्ठयात शङ्कास्पद अवस्थाय् लुइका खानतलासी याःबलय् सच्छिया २९ गू थान नक्कली नोटलिसें ज्वनेज्या जूगु जानकारी बियादील ।

ज्वंम्ह श्रेष्ठं बिउगु बयानया लिधंसाय् थप ४म्हसित नक्कली ध्यबा छापे यायेत छ्यलिगु मेसिनलिसें नियन्त्रणय् काःगु खः । ज्वंपिंपाखें प्रहरीं सक्कली थें हे खनेदइगु सच्छिया ५ सः व द्वःछिया नोट लुइकुगु खः ।

जाली नोट कारोबारीतयेसं सच्छि दरया  १५सः थान नक्कली नोट बजारय् छ्वयेधुकुगु प्रहरी अनुसन्धानपाखें लूगु बौद्ध प्रहरीं बिउगु दु । प्रहरीं जालीनोट दयेकेत छ्यलिगु प्रिन्टर मेसिन, भ्वँ, भ्वँ टिकेट छय्लिगु फेभिकोल, मोबाइल, लालीगुँरास छाप व कैंची लुइकुगु दु ।

जाली नोट बजारय् दूगु जुइ फइगु धका प्रहरीं सचेत जुइत इनाप याःगु दु ।

Categorized in अपराध