जिगु लुमन्तिइ विक्रम शाक्य दाजु
– बिराजकाजी राजोपाध्याय
 
नेवाः पत्रकारिता ख्यलय् विक्रम शाक्य म्हसीकाच्वनेमाःगु नां मखु ।सकसिनं म्हस्यूम्ह, सकसिया यःम्ह मेट्रो एफ.एम.या ज्याझ्वः न्ह्याकामि लिसें छापा माध्यमय् सशक्त रुपं कलम न्ह्याःम्ह वय्कः । लिपांगु इलय् ल्वचं वय्कःयात चीत ला स्वःगु खः । छुं ई ला लासाय् हे तयाबिल । अथेसां भचा जुइ फय्वं हाकनं नं थःगु कर्मयात निरन्तरता बीगु कुतः वय्कलं यानादीगु खः, यानाच्वनादीगु खः ।
 
तर नियतीयात थ्व मयःगु खःला मस्यू, झीलिसे फायाः गबलें लिहां मवइकथं वय्कःयात यंकाबिल । विश्वास याय्त अझं थाकुनि, म्हगसय् म्हनाच्वंगु खःला, न्ह्यलं चाइबलय्, अहो गपाय्सकं बांमलाःगु म्हगसय् म्हनाच्वंगु धाय्ला धइथें जुइ । तर मखु, थ्व सत्य जुयाबिल, विक्रम शाक्य झी दथुइ मन्त । 
 
वय्कःयात म्हस्यूगु दंदँ हे दय्धुंकल । जिपिं नापलाय्गु व्हःताः ब्यूगु धइगु भाषां हे खः । जि नं थःगु मांभाय् नेपालभाषाया लागिं छुं याय्माः धइगु बिचाः तयाच्वनाम्ह, वय्कः नं उकथं हे भाषा ख्यलय् न्हापांनिसें सक्रियम्ह । वय्कःयात दक्कले न्हापां नापलाःगु गन व गबले धइगु लुमंकेमफुत । तर दक्कले लिपा नापलाःगु धइगु छुं ला न्ह्यः, थन लकडाउन जुइ छुं वाः अथवा लाबला न्ह्यः हे जुइफु, यलया पुंचलिलिक्क कुंछेँय् तुतां चुयाः बुलुहुँ न्यासि झायाच्वंगु । आः ठिक जुल विक्रम दाईयात धकाः जिं न्यनाबलय् वय्कलं थथे धयादीगु खः, ‘बुलुहुँ जियाच्वंगु दु का ।
 
जुइत भचा थाकु, अथेसां गुलि सुम्क च्वन, उलि मफयावनी । थ्व शरीरयात ज्युतल्ले संकातय्माः ।’ वरिष्ठ संगीत श्रष्टा अमरराज शर्मा राजोपाध्यायया हना ज्याझ्वः यानागु इलय् नं गुलिसित प्रचार प्रसारय् ग्वाहालि याय्त इनाप यानां नं ग्वाहालि याय्त नुगः स्याःगु नं खन सा विक्रम शाक्य दाजुं जिं फक्व प्रचार प्रसारय् ग्वाहालि याय् धकाः थम्हं हे धयाः अमरराज दाईया, ज्याझ्वः कजिया ल्याखं जिगु अन्तर्वार्तालिसें थीथी कथं रेडियोय् ज्याझ्वः तयाः वय्कलं ग्वाहालि यानादीगु लुमंसे वः ।
 
विक्रम शाक्य धकाः नां काय्वं दक्कले लुमनीगु ई धइगु क्लासिक एफ एमय् जिमिसं नापं ज्याझ्वः न्ह्याकागु ई खः । २०५८ सालय् विक्रम शाक्यलिसें नेवाः पत्रकार राष्ट्रिय दबूया वर्तमान नायः सुरजबीर बज्राचार्य, संचारकर्मीलिसें कलाकार सुरज व्यन्जनकार, अधिवक्ता लिसें नेपालभाषा मंकाः खलःया पुलांम्ह नायः किरण शाक्य अले पत्रकार राजीव राजोपाध्याय न्याम्ह जानाः कलश मिडिया प्रा.लिं धइगु कम्पनी दर्ता यानाः क्लासिक एफ एम १०० स बहनी ९ः३० ताः इलंनिसें ११ः००ताः तक्कया ई न्यानाकयाः भिंतुना सच्छि ज्याझ्वः न्ह्याःगु दुगु खः ।
 
उगु ज्याझ्वः पुचलय् जि नं दुथ्याःगु जुल । विक्रम शाक्य दाजुं ज्याझ्वः कजि जुयाः थःगु योगदान बियादिल । उगु इलय् ज्याझ्वःया डिजाइन याय्गु, उकियात बांलाकेत माःकथंया योजना दय्केगु आदि ज्याय् जि व विक्रम शाक्य दाजु निम्ह जानां यक्व ज्या यानागु दु । उगु इलय् वय्कलं न्ह्याकादीगु धम्प तछ्या ज्याझ्वः नं जिपिं निम्ह जानाः हे दय्कागु खः ।
 
थनथाय् उगु हे दँय् सर्वोच्च अदालतं स्थानीय निकायस स्थानीय भाय् छ्यलेमदु धकाः फैसला याःबलय् उगु फैसला विरुद्ध नेवाःत आन्दोलित जूगु खः । उगु आन्दोलनय् नं विक्रम शाक्य उलि हे सक्रिय जुयाः ब्वाँय् जूगु नं थौं मिखाय् लुयाच्वं । छन्हु ला असनय् पुलिसं लाठी चार्ज यानाः वय्कःया ल्हातय् दायाब्यूबलय् ल्हाः हे मनावःगु खः । उगु दिनय् वय्कः जिगु हे छेँय् द्यनादीगु खः । ल्हाः संके थाकुल धाधां हे नं वय्कलं माःगु ज्या यानाच्वनादीगु खः । थःगु शरीरयात सुम्क तय्मज्यू धइगु कथं वय्कलं उबले नं थःगु मनावःगु ल्हाःयात जबर्जस्ती हे धइथें ज्या याका च्वनादीगु खः ।
 
वय्कःया सक्रियता धात्थें च्वछाय्बहःजू । वय्कः दनिगु खःसा नेवाः ख्यःया नितिं वय्कलं अझं थःगुपाखें फक्व योगदान बियादी धइगु खँय् शंका याय्गु थाय् मदु । वय्कः मदुगु नेवाः ख्यः, नेपालभाषा माध्यमया पत्रकारिता ख्यःया नितिं तःधंगु क्षति खः ।