जिल्ला प्रशासन कार्यालय कन्ह्य निसे कडा नीति
लहनान्युज | बछलाथ्व अष्टमी ११४०, जेष्ठ २ शुक्रवाः
स्वनिगलय् कोरोना संक्रमितपि अप्वोया वःगुलि जिल्ला प्रशासन कार्यालय, काठमाडौ न लकडाउन कार्यान्वयय् थप कडा यायेगु नीति अख्तियार याःगु दु ।
प्रशासनं थी थी बहानाय् येँय् दुने सतक व गल्लीइ पिहा वइपि मनू तयेत ज्वनेगु तक निर्णय याःगु दु ।
गृह मन्त्रलायया निर्देशन कथं, शुक्रवाः न्हिनय् च्वःगु जिल्ला सुरक्षा समितिया बैठकं मनू तयेगु हुलमुल मयायेत थुगु नियम लागू यायेगु निर्णय यानागु धका धाःगु दु । थ्व स्वया न्ह्य येँ मूल सतकय् प्राथमिकता तया प्रहरीपिन्त लकडाउन कार्यान्वयय् खटे याना तःगु खः ।
प्रशासनं थ्व स्वया न्ह्य जारी याःगु ई–पास व म्हासुगु रङया पास खारेज याःगु दु । आ जारी याइगु पास वचुगु जुइगु धका धाःगु दु । प्रशासनं हेभीं सवारीसाधनयात बहनिया ८ बजे निसे सथया ६ बजे तक चले याये दइ धका धाःगु दु ।
एम्बुलेन्स, शव बाहन, वासः व स्वास्थ्य सामग्री, पेट्रोलियम पदार्थ, ग्यास, दक्को प्रकारया खाद्य वस्तु, तरकारी व फलफूल लगायतया सामग्री ज्वना चले याइगु गाडीयात बिना पास चले याये दइगु ब्यवस्था याःगु दु ।
