जिल्ला प्रशासन कार्यालय ४ गते निसे ज्या सुरु
लहनान्युज | ञंलागा ३० ११४०,असोज १ बिहीवाः
जिल्ला प्रशासन कार्यालय काठमाडौं न थ्व स्वया न्ह्यः स्थगित याना तःगु सेवा थ्व हे वइगु असोज ४ गते आइतवाः निसे हाकन सञ्चालन याये त्यःगु दु ।
कोरोना संक्रमणया जोखिम अप्वोया वःगुलि प्रशासन कार्यालय साउन २५ गते सेवापि स्थगित याःगु दु ।
प्रशासन कार्यायल बिहीवाः छगु सूचं जारी याना न्हुगु नागरिकता, नागरिकताया प्रतिलिपी, नाबालक परिचयपत्र, राहदानी, हातहतियार दर्ता, पत्रपत्रिका, संघसंस्था दर्ता व नवीकरण सम्बन्धी सेवा असोज ४ निसे चायेके त्यःगु खः ।
तर आः कार्यालयय् हुलमुल मयाकेत सेवाग्राहीयात स्थानीय तहया कथं सेवा बिइगु बार तोकेयाःगु दु ।
थुगु कथं येँ महानगरपालिकां सेवाग्राही नं आइतवाः, मंगलवाः व बिहीवाः सेवा काये दइ । अथेहे, किपू, नागार्जुन व चन्द्रागिरि नगरपालिकां सेवाग्राहीपिन्सं सोमवाः, बुढानीलकण्ठ, टोखा, कागेश्वरी मनहरा नगरपालिकाया सेवाग्राहीं बुधवाः व गोकर्णेश्वर, दक्षिणकाली, शंकरापुर व तारकेश्वर नगरपालिकाया सेवाग्राहीपिन्स शुक्रवाः सेवा काये दइ ।
संस्था दर्ताया ज्या सोमवाः व बुधवाः जक जुइ, नवीकरण आइतवाः, मंगलवाः व बिहीवाः जुइ । पत्रपत्रिका व छापाखाना दर्ता व विधान संशोधनया ज्या शुक्रवाः जक जुइगु सूचं जारी याःगु खः । संघसंस्थाया प्रतिलिपि पत्रचार सम्बन्धी सेवा धाःसा न्हि ४ बजे लिपा यायेगु जिल्ला प्रशासन कार्यालय काठमाडौ धाःगु दु ।
Categorized in राष्ट्रिय
