बैतडीया पाटन नगरपालिका १ सकारथलीइ वंगु चान्हय् जिप दुर्घटना जूबलय् न्याम्ह सीगु दु ।

दुर्घटनाय् पाटन नगरपालिकाया ४०दँया जानकी भट्टराई, १३ दँया विनोद भट्टराई, ७२दँया रमा भट्टराई, २४दँया प्रेम चुनारा व २०दँया मनिषा विक सीगु खः । जानकी पाटन प्राथमिक स्वास्थ्य केन्द्रय् मदुगु खःसा मेपिं प्यम्ह घटनास्थलय् हे मदुगु खः ।

सीपिंमध्ये प्रेम व मनिषाया १०न्हु न्ह्यः तिनि इहिपा जूगु खः । उपिं थःछेँपाखे वनाच्वंगु खः । दुर्घटनाय् लानाः मेपिं न्याम्ह घाःपाः जूगु दु । उपिंमध्ये निम्हेसित जिल्ला अस्पताल डडेल्धुरा व मेपिन्त पाटन प्राथमिक स्वास्थ्य केन्द्रय् यंकूगु दु ।

बैतडीया पाटन बजारं कैलपाल वनाच्वंगु से १ ज ८८८ ल्याःया जिप दुर्घटना जूगु खः । जिपय् ११ दुु खः । जिप चालक पाटन ५ बसन्तरपुरया खेमराज पाण्डेय फरार जूगु दु ।

जीप सडकं सच्छि मिटर क्वय् कुतुंवंगु खः । कच्ची, चुल्लूगु व पाःचा लँ जूगुलिं दुर्घटना जूगु जुइफुगु प्रहरीं धाःगु दु ।

Categorized in अपराध