जेट मेसिन सञ्चालन याःगु न्हापागु वडा
नृपेन्द्रलाल श्रेष्ठ | दिल्लाथ्व पुन्ही ११४०,असार २१ आइतवाः
यल महानगरपालिका- ३ वडा ढः सफा यायेगु उच्च प्रविधियुक्त जेट मेसिन सञ्चालनय् हःगु देय् या हे न्हापागु वडा जुगु दु ।
थुग वडां चालू आर्थिक वर्षया बजेटपाखे ७७ लाख पुला उगु जेट मेसिन न्यानःगु धका वडा नं ३ या वडा अध्यक्ष श्रीगोपाल महर्जन धयादिगु दु ।
जेट मेशिन बहुप्रयोजनया लागि उपयोगी जु । जेट मेसिनं २० मिटर क्वय् तक ढः सफा याये फइ, सफा लः साला तयेत, ढः दुने बोरा, प्लास्टिक थाना च्वंगु लिकाये फइ । उगु जेट मेशिनं जाम जूगु ढः या लः तयेगु व सफा लखं हाई प्रेसरया जेट मेशिन मार्फत सफा याइ ।
‘देय् यकं जेट मेसिन सञ्चालन याःगु थ्व हे न्हापागु वडा जुइफु । महानगरपालिकां जक जेट मेसिन न्याना च्वंगु थन वडा हे मेशिन सञ्चालन याःगु दु धका धयादिगु खः ।’ उगु मेशिनया उलेज्या यानादिसे यल क्षेत्र नं ३ या सांसद पम्फा भुसालं थुगु ज्या मेमेगु वडायात उच्चत्तम प्रविधियुक्त मेसिनपाखे ज्या यायेगु प्रोत्साहन याइगु धका भलसा कयादिगु खः ।
वडा हे उच्चत्तम प्रविधियुक्त मेसिन सञ्चालन यागुलि लय्तादिसे महानगरपालिकाया मेयर चिरिबाबु महर्जनं स्मार्ट प्रविधिले हे जनतायात गुणस्तरीय सेवा बिइगु धका थःगु खँ तयादिल ।
थ्व स्वया न्ह्यः शव बाहन सञ्चालन यायेत वडां आः ज्येष्ठ नागरिकपिनिगु लागि निशुल्क विधुतीय गाडी सञ्चालनय् हयेगु तयारी याना च्वंगु खः ।
