जोकोभिचं त्याकल थुगुसीया विम्बल्डन टेनिस
दिल्लाथ्व व्दितिया ११४१, असार २८ सोमबाः
सर्वियन टेनिस कासामि नोभाक जोकोभिचं थुगुसीया विम्बल्डन टेनिसया उपाधि त्याकूगु दु ।
लण्डनय् वंगु चान्हय् जूगु फाईनल कासाय् इटालीया माटियो बेरेटीनीयात ६–७, ६–४, ६–४ व ६–३ या सेटय् बुकाः जोकोभिच च्याम्पियन जूगु खः ।
कासा त्याःगुलिसें जोकोभिचं दक्कले अप्वः ग्राण्डस्लाम उपाधि त्याकूपिं रोजर फेडेरर व रफाइल नदालया २० उपाधिलिसे ज्वलिंज्वः याःगु दु । आधुनिक टेसिनया थुपिं स्वम्ह हस्ती दथुइया दक्कले महान कासामि धायेकेत धेंधें बल्लाः जुयाच्वंगु दु ।
स्वम्हं आः नं सक्रिय कासा जिवनय् दु । फेडेरर थुगुसी विम्बल्डनया फाइनलतक्क थ्यनेमफुत सा नदालं थुगुसी म्हितेमफूगु खः । थज्याःगुलिइ उपाधि त्याकाः जोकोभिचं निम्हेसितं ध्वदुकूगु खः ।
Categorized in कासा